China Southern Airlines-ის რეისი, რომელიც ადგილობრივი დროით 6 მარტს, დილის 10 საათზე, იყო დაგეგმილი, 4 საათით გადაიდო. ამის მიზეზი კი ისაა, რომ თვითმფრინავის ერთ-ერთმა მგზავრმა ძრავაში მონეტები შეყარა. მონეტები თვითმფრინავის შემოწმების დროს აღმოაჩინეს, მგზავრი კი დააკავეს.

ადგილობრივი მედიის მიერ გავრცელებულ ვიდეოში ბორტგამცილებელი მგზავრს ეკითხება, თუ რამდენი მონეტა ჩაყარა თვითმფრინავის ძრავაში. მგზავრი, რომლის ვინაობაც არც ვიდეოში და არც მედიების მიერ არ გაჟღერებულა, ამბობს, რომ ძრავაში 3-დან 5 მონეტამდე შეყარა.

"თვითმფრინავის ტექნიკურმა პერსონალმა უსაფრთხოება შეამოწმა და დაადგინა, რომ აფრენამდე უსაფრთხოების პრობლემები არ ყოფილა", — განაცხადა ავიაკომპანიის წარმომადგენელმა. ასევე, China Southern Airlines-მა სოციალურ ქსელში პოსტი გამოაქვეყნა, რომელშიც ნათქვამია, რომ თვითმფრინავის ძრავაში მონეტების შეყრა საავიაციო უსაფრთხოებას საფრთხეს უქმნის, რაც შესაბამისი ზომებით დაისჯება.

აღსანიშნავია, რომ ეს პირველი შემთხვევა არაა, როცა ჩინეთში მგზავრები თვითმფრინავის ძრავაში მონეტებს ყრიან. მგზავრებს სჯერათ, რომ ძრავაში შეყრილი მონეტები იღბალს მოუტანთ და უსაფრთხოდ იფრენენ.

გასული წლის ოქტომბერში China Southern Airlines-ის ერთ-ერთი რეისი გაუქმდა, რადგან შენიშნეს, რომ მგზავრმა თვითმფრინავის ძრავაში მონეტები ისროლა. ასევე, 2021 წელს GX Airlines-ის კიდევ ერთ ფრენა გაუქმდა, რადგან ძრავაში წითელ ქაღალდში გახვეული რამდენიმე მონეტა იპოვეს. 2020 წელს კი ერთ-ერთ მგზავრს, რომელმაც თვითმფრინავის ძრავაში მონეტები შეყარა, სასამართლომ ჯარიმის სახით $17 200-ის გადახდა დააკისრა.