ტეილორ სვიფტის ფანებისთვის საიდუმლო არაა, რომ პოპვარსკვლავი თავისი სიმღერების ტექსტებში ხშირად იყენებს ალუზიებს კლასიკოსი პოეტების შემოქმედებაზე. მუსიკოსს საყვარელ ავტორებს შორის მოუხსენიებია ცნობილი ამერიკელი პოეტი ემილი დიკინსონიც. ახლახან კი გაირკვა, რომ ეს შემთხვევითობა სულაც არაა — სვიფტი თურმე დიკინსონს ენათესავება.

გენეალოგიის კვლევითმა კომპანიამ Ancestry.com-მა გაავრცელა ინფორმაცია, რომ თანამედროვე პოპვარსკვლავსა და მე-19 საუკუნის პოეტს საერთო წინაპარი ჰყავდათ: ეს იყო ინგლისელი ემიგრანტი, რომელიც მე-17 საუკუნეში კონექტიკუტის პატარა ქალაქ უინძორის ერთ-ერთი პირველი მოსახლე გამხდარა. ექსკლუზიურ ცნობაში ასევე აღნიშნულია, რომ მას შემდეგ სვიფტის წინაპრების კიდევ ექვსი თაობა დარჩა კონექტიკუტში, მოგვიანებით კი, მათ პენსილვანიის ჩრდილოდასავლეთში გადაინაცვლეს, სადაც სწორედ სვიფტების საგვარეულოს დაუკავშირდნენ. ასე რომ, ტეილორი და ემილი ერთგვარად გარე ბიძაშვილები ყოფილან.

ფოტო: Taylor Swift / Republic Records

სხვათა შორის, 2022 წელს, როცა სვიფტმა ათწლეულის საუკეთესო სიმღერების ავტორის ჯილდო მიიღო, სამადლობელ სიტყვაში დიკინსონიც ახსენა.

"თუ ჩემი სიმღერების ტექსტები ემილი დიკინსონის მაქმანებიანი ფარდის ქსოვაში გართული დიდი ბებიის წერილივით ჟღერს, ამის უკან მე გახლავართ ფრთით ხელში", — განაცხადა მუსიკოსმა.

"ფრთა" ამ შემთხვევაში, წარმოსახვითი ობიექტია, რომელსაც სვიფტი იყენებს თავისი სიმღერების კატეგორიზაციისთვის: ფრთით, კალმისტრით და ბრჭყვიალა გელიანი კალმით დაწერილი ტექსტები.

///

ალბათ არც ისაა უბრალო დამთხვევა, რომ სვიფტის რიგით მე-9 სტუდიური ალბომი, Evermore, რომელიც "ფრთით" დაწერილ ყველაზე მეტ სიმღერას აერთიანებს, 10 დეკემბერს გამოვიდა — ემილი დიკინსონის დაბადების დღეზე.

ტეილორ სვიფტის სიმღერების ტექსტების პოეტურობა აკადემიურ წრეებშიც არ დარჩენიათ ყურადღების მიღმა. 2022 წელს, კემბრიჯის ლათინური ენის პროფესორმა თავის სტუდენტებს ურჩია, სწავლის პროცესში სვიფტის სიმღერებიც გამოეყენებინათ. გასულ წელს ცნობილმა შექსპიროლოგმა პოპვარსკვლავს "ბუმბერაზი პოეტი" უწოდა. ცოტა ხნის წინ კი ბელგიის ერთ-ერთ უნივერსიტეტში ტეილორ სვიფტის ინსპირაციით ლიტერატურული სალექციო კურსი შეიქმნა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...