დღეს, 16 თებერვალს, რუსეთის სასჯელაღსრულების სამსახურმა გაავრცელა ცნობა რუსი ოპოზიციონერი პოლიტიკოსის, ალექსეი ნავალნის გარდაცვალების შესახებ.

• ოფიციალური ინფორმაციის თანახმად, ნავალნი იამალის ნახევარკუნძულზე მდებარე კოლონიაში გარდაიცვალა.
• რუსეთის სასჯელაღსრულების სამსახური აცხადებს, რომ ნავალნიმ თავი გასეირნების შემდეგ შეუძლოდ იგრძნო და გონება დაკარგა, ადგილზე მისულმა სასწრაფო სამედიცინო დახმარების ექიმებმა კი პატიმრის რეანიმირება ვერ შეძლეს.
• კრემლის პროპაგანდისტული რაშა თუდეი (RT) წერს, რომ ნავალნის თრომბი განუვითარდა.

გამოხმაურებები

შარლ მიშელი, ევროპის საბჭოს პრეზიდენტი: "ალექსე ნავალნი იბრძოდა თავისუფლებისა და დემოკრატიის ღირებულებებისთვის. საკუთარი იდეალებისთვის მან უდიდესი მსხვერპლი გაიღო. ევროკავშირი ამ ტრაგიკულ გარდაცვალებაზე სრულ პასუხისმგებლობას რუსულ რეჟიმს აკისრებს. მე ღრმა სამძიმარს ვუცხადებ მის ოჯახს და ყველას, ვინც მსოფლიოში, ასეთ მძიმე პირობებში დემოკრატიისთვის იბრძვის. მებრძოლები კვდებიან, თუმცა თავისუფლებისთვის ბრძოლა არასოდეს მთავრდება."

რობერტა მეცოლა, ევროპარლამენტის პრეზიდენტი: "რუსეთმა წაართვა მას თავისუფლება და სიცოცხლე, მაგრამ ღირსება — ვერ. მისი ბრძოლა დემოკრატიისთვის გრძელდება. ჩვენი ფიქრები მის ოჯახთან არის."

ედგარ რინკევიჩი, ლატვიის პრეზიდენტი: "რასაც არ უნდა ფიქრობდეთ ალექსეი ნავალნიზე, როგორც პოლიტიკოსზე, ის, უბრალოდ, სასტიკად მოკლა კრემლმა. ეს ფაქტია და ეს არის ის, რაც თქვენ უნდა იცოდეთ დღევანდელი რუსული რეჟიმის ჭეშმარიტი ბუნების შესახებ. ვუსამძიმრებ ოჯახს და მეგობრებს."

სალომე ზურაბიშვილი, საქართველოს პრეზიდენტი: "ალექსეი ნავალნის სიკვდილი ტრაგედიაა დემოკრატიისა და ადამიანის უფლებების ყველა დამცველისთვის. ვუსამძიმრებ მის ოჯახს და მათ, ვინც რუსეთში დემოკრატიისათვის ბრძოლას განაგრძობს".

რიში სუნაკი, ბრიტანეთის პრემიერ მინისტრი: "საშინელი ამბავია. როგორც რუსული დემოკრატიის ყველაზე მგზნებარე დამცველმა, ალექსეი ნავალნიმ წარმოუდგენელი გამბედაობა გამოიჩინა მთელი თავისი ცხოვრების მანძილზე. ჩემი ფიქრები მის მეუღლესთან და რუს ხალხთანაა, ვისთვისაც ეს უდიდესი ტრაგედიაა."

ვოლოდიმირ ზელენსკი, უკრაინის პრეზიდენტი: "ცხადია, ნავალნი მოკლა პუტინმა, ისევე როგორც მრავალი ათასი სხვა ადამიანი. პუტინს არ აინტერესებს, ვინ მოკვდება. მისთვის მნიშვნელოვანია თავისი პოზიციის შენარჩუნებას", — თქვა ზელენსკიმ ბერლინში, კანცლერ შოლცთან ერთად გამართულ პრესკონფერენციაზე.

ანალენა ბერბოკი, გერმანიის საგარეო საქმეთა მინისტრი: "ისე, როგორც სხვა არავინ, ალექსეი ნავალნი იყო სიმბოლო თავისუფალი და დემოკრატიული რუსეთის. სწორედ ეს არის მიზეზი, რის გამოც ის გარდაიცვალა. ჩემი ფიქრები მის ცოლთან და შვილებთანაა."

გიტანას ნაუსედა, ლიეტუვის პრეზიდენტი: "ნავალნი ციხეში არ მომკვდარა, ის მოკლა კრემლის სისასტიკემ და მისმა მიზანმა, გააჩუმოს ოპოზიცია ნებისმიერ ფასად. რუსეთის რეჟიმმა პასუხი უნდა აგოს შედეგებზე."