ტეილორ სვიფტის ფანები ბოლო დღეების განმავლობაში ვერ თანხმდებოდნენ იმის შესახებ, თუ როგორ მოასწრებს მომღერალი ტოკიოში კონცერტის ჩატარებას, შემდეგ კი ლას-ვეგასში Super Bowl-ზე დასწრებას, სადაც მისი შეყვარებული, ტრევის კელსი, თამაშობს. ახლახან იაპონიის საელჩომ ტეილორის ფანები დაამშვიდა და განაცხადა, რომ მომღერალი Super Bowl-ზე დასწრებას მოახერხებს.

ტეილორ სვიფტი იაპონიის დედაქალაქ ტოკიოში, ტურნეს ფარგლებში, კონცერტებს 7-10 თებერვალს გამართავს, ხოლო ლას-ვეგასში Super Bow 11 თებერვალს ჩატარდება. ასევე გასათვალისწინებელია დროის სხვაობა და ხანგრძლივი ფრენა, რის გამოც მომღერლის ფანები შიშობდნენ, რომ ტეილორი თამაშზე დასწრებას ვერ მოახერხებდა.

Eras Tour-ის გამოსვლების შესაბამისად, ტეილორის ბოლო კონცერტი, რომელიც საღამოს 6 საათზე იწყება, 3 საათის განმავლობაში გაგრძელდება. ამას ემატება გადატვირთული მოძრაობაც, რომელიც მომღერალს კონცერტის დასრულების შემდეგ დახვდება. თუმცა ამ ყველაფრის გათვალისწინებითაც, იაპონიის საელჩოს განცხადებით, ღელვა არ ღირს.

"12-საათიანი ფრენისა და 17-საათიანი დროში სხვაობის მიუხედავად, საელჩოს დარწმუნებით შეუძლია თქვას, რომ თუ ტეილორის კონცერტის შემდეგ ტოკიოდან საღამოს გაემგზავრება, ლას-ვეგასში ჩასვლას Super Bowl-ის დაწყებამდე შეძლებს", — ნათქვამია იაპონიის საელჩოს განცხადებაში.

შეგახსენებთ, რომ ტეილორ სვიფტმა მსოფლიო ტურნე გასული წლის მარტში დაიწყო და აშშ-ში უკვე დაამთავრა კიდეც. ტურნე, სახელად The Eras Tour, მსოფლიო მასშტაბით 2024 წლის ჩათვლით გაგრძელდება.