მოკლედ: დეკანოზი შალვა კეკელია 9 თებერვალს, პარასკევს, 23:00 საათზე, კლუბი ბასიანის ტერიტორიასთან პარაკლის გადაიხდის. ამის შესახებ ფეისბუქით გავრცელებული ვიდეომიმართვისას განაცხადა.

დეტალები: "მივიდეთ კლუბთან და პარაკლისი გადავიხადოთ, ღმერთს ვთხოვოთ, ჩვენი ახალგაზრდობა გადაგვირჩინოს", — ამბობს მართლმადიდებლური ეკლესიის სასულიერო პირი.

  • მისი თქმით, ამ ფორმით ეხმიანება 27 იანვარს 19 წლის ახალგაზრდის გარდაცვალებას, რისი მიზეზიც, სავარაუდოდ, კლუბური ნარკოტიკი იყო.

კონტექსტი: 27 იანვარს 19 წლის გოგო გარდაიცვალა. როგორც კლუბი ბასიანი წერს, ახალგაზრდა ქალი კლუბის ტერიტორიაზე "დაუდგენელი მიზეზით" ცუდად გახდა, რის შემდეგაც, "მომენტალურად გაეწია პირველადი დახმარება შესაბამისი კვალიფიკაციის მქონე უსაფრთხოების გუნდის მხრიდან".

  • ბასიანის მიხედვით, დაახლოებით, 10-12 წუთში ის სასწრაფო სამედიცინო დახმარების საშუალებით გადაიყვანეს კლინიკაში, სადაც გარდაიცვალა.

ბასიანის პოზიცია: კლუბი მხოლოდ დღეს გამოეხმაურა მომხდარს. მათი თქმით, "საკითხის სენსიტიურობის გამო და ზუსტი ინფორმაციის მოპოვებამდე" თავს იკავებდნენ კომენტარის გაკეთებისგან.

  • კლუბი აღნიშნავს, რომ პრობლემას და ტრაგედიებს ქვეყანაში არსებული ნარკოპოლიტიკა ქმნის: "ჩვენ აქამდეც არაერთხელ გვითქვამს, რომ არსებული ნარკოპოლიტიკის პირობებში საზოგადოების თითოეული წევრის ჯანმრთელობის დაცვისა და გაფრთხილების რესურსები და შესაძლებლობები შეზღუდულია და რადიკალური პრევენციული ზომების მიღება - შეუძლებელი", — წერს ბასიანი.
  • ბასიანი შეახსენებს სახელმწიფოს, რომ ჰუმანური ნარკოპოლიტიკის შესამუშავებლად პასუხისმგებლობა მას აკისრია: "საკლუბო კულტურის მიზანმიმართული დემონიზებისა და დისკრედიტაციის ნაცვლად, შედეგის მომცემი იქნება, პასუხისმგებლობა შევახსენოთ სახელმწიფოს, ვის ხელშიცაა სისტემური ცვლილების მთავარი ბერკეტი ზიანის შემცირებასა და ზრუნვაზე ორიენტირებული ჰუმანური ნარკოპოლიტიკის შესამუშავებლად", — წერია ბასიანის განცხადებაში.

მსგავსი: დრაკონული ნარკოპოლიტიკის ტყვეობაში