მოკლედ: საყდრისის კომიტეტი ბახმაროში მრავალსართულიანი საცხოვრებელი კომპლექსის მშენებლობას ადგილობრივი ბიომრავალფეროვნებისა და ავთენტური გარემოსთვის "უკიდურესად დამაზიანებელს" უწოდებს.

• მშენებლობას აწარმოებს ორბი ჯგუფი, რომელმაც რუსულენოვანი საინფორმაციო "სლაიდებით" გამართა პროექტის პრეზენტაცია.
• On.ge-მ კომპანიას კითხვებით მიმართა. მათგან ველოდებით პასუხს.

რატომ არის მნიშვნელოვანი: საყდრისის კომიტეტის მიერ გავრცელებული განცხადების მიხედვით, მათ აღშფოთებას იწვევს ხელისუფლების მიერ სამშენებლო ნებართვის გაცემა, "რადგან ეს ავტომატურად ნიშნავს თანხმობას ამ უნიკალური ბუნების ძეგლის იერსახის დამახინჯებასა და ეკოლოგიის განადგურებაზე. მსგავს ეკოლოგიურ კურორტებზე ამ მასშტაბის მშენებლობები დაუშვებელია."

იმ შემთხვევაში, თუ დაგეგმილი მშენებლობა არ შეჩერდება,

• საყდრისის კომიტეტი კულტურული მემკვიდრეობისთვის წევრები "დაუყოვნებლივ გააპროტესტებენ ამ ფაქტს ადგილზე."
• ისინი მოუწოდებენ ეკოლოგიისა და კულტურის საკითხებზე მომუშავე ყველა ორგანიზაციასა და აქტივისტს, გამოხატონ საკუთარი პოზიცია ბახმაროში დაგეგმილ მშენებლობასთან დაკავშირებით: "აუცილებელია, დროულად დაისახოს სამოქმედო გეგმა, რათა გადავარჩინოთ ეს უნიკალური კურორტი და მისი მდიდარი ბიომრავალფეროვნება", — აცხადებს კომიტეტი.
• განცხადებაში ასევე, ვკითხულობთ, რომ ცენტრალური და ადგილობრივი ხელისუფლების მხრიდან ბოლო ათი წლის განმავლობაში არ გადადგმულა მნიშვნელოვანი ნაბიჯები ბახმაროს, როგორც კურორტის ინფრასტრუქტურის განვითარებისა და პოპულარიზაციის კუთხით.

რა ვიცით მშენებლობის შესახებ, რომლის პრეზენტაცია რუსულენოვანი სლაიდებით გამართეს: ბახმაროში დაგეგმილი მშენებლობის შესახებ ორი დღის წინ ჩოხატაურის მერმა, დათო შარაშენიძემ გაავრცელა ინფორმაცია ფეისბუქზე.

• მან, ასევე, გამოაქვეყნა ვიზუალური მასალაც იმის თაობაზე, თუ რა მასშტაბს მოიცავს მშენებლობა. "ბახმაროს ახალი სიცოცხლე. მომავლის ბახმარო. ორბი ჯგუფი ბახმაროში მშენებლობას იწყებს", — დაწერა ჩოხატაურის მერმა.
• მერმა გაავრცელა ფოტოებიც, რომელიც გადაღებულია სავაურადოდ, პროექტის პრეზენტაციისას, რომელშიც ჩანს, რომ პროექტის შესახებ მომზადებული ინფორმაციული ტექსტები ინგლისურთან ერთად, რუსულ ენაზეა.

On.ge დაუკავშირდა კომპანიის საზოგადოებასთან ურთიერთობის სამსახურს და კითხვებით მიმართა.

მათგან გვსურს დავაზუსტოთ,

• რა არგუმენტებით უპასუხებენ საყრდრისის კომიტეტის განცხადებას, რომ მათ მიერ წარმოებული სამშენებლო პროცესი "უკიდურესად დააზიანებს გარემოს".
• ასევე, ველოდებით პასუხს, რატომ გამართეს პროექტის პრეზენტაცია რუსულენოვანი სლაიდებით. მასალა მათგან მიღებული ინფორმაციის მიხედვით განახლდება.

სტრიქონებს შორის: კომპანია აქტიურად იყენებს რუსულ ენას მარკეტინგულ კამპანიებში.

• მათი ოფიციალური საიტი მომხმარებელს რუსულ ენაზე მომზადებულ კლიპებს სთავაზობს.
• და აიფაქტის მიხედვით, თანამშრომლობს რუსულ კომპანია გინზასთან, რაც დასტურდება კიდეც ორბის საიტზე განთავსებული ინფორმაციით.
• რუსული კომპანიის რესტორნები ორბის ბათუმის ზღვისპირა კორპუსების ბოლო სართულზეა განთავსებული.

დეტალები: სამი დღის წინ, ორბი ჯგუფმა ონლაინ-მედიაში სარეკლამო წესით განათავსა ინფორმაცია ბახმაროში დაგეგმილი პროექტის შესახებ და განაცხადა, რომ მრავალფუნქციურ კოლმპლექსში აპარტამენტების გაყიდვა დაიწყო.

• კომპანია აცხადებს, რომ ბახ­მა­რო­ში სასტუმროს 350 ნო­მერს გა­ყი­დის.
• "სას­ტუმ­რო კომ­პლექ­სი ბახ­მა­როს უნი­კა­ლურ ად­გილ­ზე გან­თავ­სდე­ბა და მთლი­ა­ნად იქ­ნე­ბა ადაპ­ტი­რე­ბუ­ლი ად­გი­ლობ­რივ ლან­დშაფტ­თან", — აცხადებენ ისინი სარეკლამო წესით გავრცელებულ პრეს-რელიზში.

ბოლო ხაზი: საყდრისის კომისია გარემოს დაცვის სამინისტროსა და დაცული ტერიტორიების სააგენტოს მოუწოდებს, "მეტი ყურადღება გამოიჩინონ ამ ფაქტის მიმართ და შეაჩერონ ბიზნეს აქტივობა, რომელიც უნიკალური ბუნების ძეგლის განადგურებას გეგმავს."