გრემი 2024-ის დაჯილდოებაზე ტეილორ სვიფტმა Midnights-ისთვის წლის საუკეთესო ალბომის კატეგორიაში გაიმარჯვა. სვიფტმა ამ მიღწევით რეკორდი დაამყარა და ერთადერთი არტისტი გახდა, რომელსაც გრემის მთავარი ჯილდო ოთხჯერ აქვს მოპოვებული. მომღერალს ჯილდო სელინ დიონმა გადასცა.

"გეტყოდით, რომ ეს ჩემს ცხოვრებაში ყველაზე ბედნიერი მომენტია, თუმცა ასეთი ბედნიერი მაშინაც ვარ, როდესაც სიმღერის წერას ვასრულებ ან მუსიკალურ ვიდეოს ვიღებ, ან სულაც კონცერტისთვის ჩემს მოცეკვავეებთან და ბენდთან ერთად რეპეტიციას გავდივარ.

ჩემთვის ჯილდო ჩემი საქმეა. ერთადერთი, რაც მინდა, ისაა, რომ იმის კეთება გავაგრძელო, რაც მიყვარს და მაბედნიერებს. მადლობა, რომ ამის საშუალებას მაძლევთ", — თქვა სვიფტმა.

სელინ დიონი და ტეილორ სვიფტი გრემი 2024-ის დაჯილდოებაზე

ფოტო: Getty Images

მომღერალმა მადლობა გადაუხადა თავის პროდიუსერს და საუკეთესო მეგობარ ჯეკ ანტონოვსაც. ტეილორმა სცენაზე აიყვანა ლანა დელ რეიც, რომელმაც Midnights-ზე მასთან ერთად იმუშავა.

ლანა დელ რეი და ტეილორ სვიფტი გრემი 2024-ის დაჯილდოებაზე

ფოტო: Getty

მუსიკოსის გულშემატკივრები ვარაუდობდნენ, რომ ის გრემის მიღებისას ალბომს დააანონსებდა, რადგან მომღერალმა დაჯილდოებამდე რამდენიმე საათით ადრე სოციალურ ქსელებში მთავარი ფოტო შავ-თეთრად აქცია, მისმა ოფიციალურმა საიტმა კი მუშაობა შეწყვიტა.

ფანების მოლოდინი გამართლდა, რადგან როდესაც სვიფტმა საუკეთესო პოპ ალბომის კატეგორიაში გაიმარჯვა და მე-13 გრემი მიიღო, მან საზოგადოებას ახალი ალბომის სახელი გაუმხილა. The Tortured Poets Department 19 აპრილს გამოვა.