ქართველთა მარშის ორგანიზატორებისა და მასში მონაწილე პირების მიერ სექსუალური შინაარსის მუქარასთან დაკავშირებით თათია დოლიძე ფეისბუკზე წერს, რომ ცდილობს ყველაფრის სამართლებრივად დალაგებას.

შინაგან საქმეთა სამინისტროს ჯგუფური გაუპატიურების მუქარაზე გამოძიება ჯერ არ დაუწყია. უწყებაში On.ge-ს განუმარტეს, რომ საგამოძიებო მოქმედებების დასაწყებად აუცილებელია სამინისტროში განცხადების შესვლა.

შსს-ს რეაგირებისკენ მოუწოდა ორგანიზაციამ ქალთა მოძრაობა. ქალთა უფლებადამცველები გამოძიების დაწყებასა და მუქარის ავტორების მიერ საჯარო ბოდიშის მოხდას მოითხოვენ.

თათია დოლიძის მიმართ ქსენოფობიური ქართველთა მარშის ორგანიზატორები და მონაწილეები, გუშინ, 16 ივლისს, ფეისბუკზე სექსუალური ძალადობის შინაარსის კომენტარებს წერდნენ, რომლებიც მუქარად აღიქმებოდა. დღეს, აღნიშნული პოსტი აღარ იძებნება, თავად პოსტების ავტორთა ნაწილი კი ამბობს, რომ მათ ეს არ დაუწერიათ. "ქართველთა მარშის" მონაწილეები გამოირჩევიან ქსენოფობიური, რასისტული, თუ ჰომოფობიური განწყობებით, მათ მიერ 14 ივლისს გამართული აქცია სწორედ ამგვარი განწყობების დემონსტრირება იყო.

განახლება: შსს-მ თათია დოლიძის მიმართ გაუპატიურების მუქარაზე გამოძიება დაიწყო.