22 თებერვალს ნეტფლიქსზე ყველასათვის საყვარელი ანიმაციის, ჰაერის უკანასკნელი მბრძანებლის, სერიალი გამოვა. მიუხედავად იმისა, რომ ანიმაციის სერიალად გადაკეთებას მაყურებლებში უამრავი მოწინააღმდეგე ჰყავს ხოლმე, ამ პროექტის მიმართ ყველას მაინც დიდი მოლოდინი აქვს, რაც საოცარი ტრეილერებით, პოსტერებითა და კარგად შერჩეული მსახიობებითაა გამოწვეული.

პრემიერამდე სულ უფრო ცოტა დრო რჩება, სერიალის შემქმნელები და მსახიობები კი მედიებს სულ უფრო მეტ დეტალს უმხელენ. მაგალითად, ცოტა ხნის წინ გამოცემა Entertainment Weekly-სთან ინტერვიუში იან ოუსლიმ (სოკა) და კიავენტიომ (კატარა) იმ განსხვავებებზე ისაუბრეს, რომლებსაც ორიგინალი ანიმაციის ფანები სერიალში შეამჩნევენ.

მსახიობების თქმით, ერთ-ერთი ასეთი განსხვავება სოკას პერსონაჟი იქნება. ანიმაციურ სერიალში სოკა სექსისტურ მოსაზრებებს ხშირად აჟღერებდა, განსაკუთრებით, საკუთარი დისა და კიოშის მეომარი გოგოების მიმართ. სოკა პირველივე ეპიზოდში საყვედურობს კატარას, როცა გაყინულ წყალში აღმოჩნდებიან და ამბობს, რომ არ უკვირს, გოგომ რომ ყველაფერი გააფუჭა.

ფოტო: Nickelodeon Animation Studio

ანიმაციაში სოკას პერსონაჟი თანდათანობით ვითარდება და აღნიშნული მოსაზრებებიც ეცვლება. ის კი არა, საკუთარ შეცდომებს ხმამაღლა აღიარებს და კიოშის მეომარ გოგოებს დაჩოქილი სთხოვს, რომ ბრძოლა შეასწავლონ.

ამის მიუხედავად, მსახიობების თქმით, ახალ სერიალში სოკას სექსისტური ფრაზები ნაკლებად ექნება.

"ვფიქრობ, [სერიალში] ისიც არ გამოჩნდება, თუ რამდენად სექსისტი იყო [სოკა]", — განაცხადა კიავენტიომ და მას სოკას მსახიობიც დაეთანხმა, რომლის თქმითაც, რადგანაც ახალი პროექტი სერიალია და არა ანიმაცია, მასში გარკვეული დეტალები განსხვავებული მიმართულებით განავითარეს.

სოკას სექსიზმი ერთადერთი განსხვავება არ იქნება სერიალსა და ანიმაციას შორის. შოუს ერთ-ერთი შემქმნელის, ალბერტ კიმის, თქმით, სერიალი განსხვავებულად დაიწყება და ისეთ სცენებსაც ვიხილავთ, რომელიც ანიმაციაში მხოლოდ ზედაპირულად იყო ნაჩვენები, მაგალითად, ჰაერის მბრძანებლების გენოციდი და ცეცხლის სამეფოს ძალაუფლებაში მოსვლა.

შემქმნელების თქმით, მაყურებლებს უნდა ახსოვდეთ, რომ ახალი პროექტი ანიმაცია არაა, რის გამოც ბევრი დეტალი ახალი და განსხვავებული იქნება.

სანამ 22 თებერვალი მოვა, ისღა დაგვრჩენია, სერიალის ტრეილერს ვუყუროთ:

ამავე თემაზე: