ინგლისელი ქალი თავისი დრონით პატრონებს დაკარგული ძაღლების მოძებნაში ეხმარება. სამხრეთ იორკშირში მცხოვრებმა, ერიკა ჰარტმა, დრონის მეშვეობით უკვე 200-ზე მეტი ცუგის პოვნა შეძლო. ერიკა ამ საქმეს მოხალისეობრივად უკვე 6 წელზე მეტია აკეთებს. ქალი ამბობს, რომ ამას თანხისთვის არ აკეთებს და ადამიანების დახმარება უნდა.

მისი თქმით, დაკარგული ძაღლის პოვნით გამოწვეული სიხარული შეუფასებელია და ლატარიის მოგებას უდრის. ჰარტი იხსენებს, რომ დრონი მამამ აჩუქა და ერთ დღეს შემთხვევით გადააწყდა მეზობელს, რომელიც დაკარგულ ძაღლს ეძებდა. ამ საქმის რეგულარულად კეთების იდეაც სწორედ აქედან დაებადა.

"პატრონისთვის ცუგა უბრალოდ ძაღლი არაა, ის ოჯახის წევრია. პირველად როცა დაკარგული ძაღლი ვიპოვე, მისი სახე უნდა გენახათ, პატრონი მას 4 დღის განმავლობაში ეძებდა. მომწონს, როცა შემიძლია, სხვა მაცხოვრებლებს გამოვადგე", — ამბობს ერიკა.

დრონის მეშვეობით მას ძაღლის ისეთ ადგილას შემჩნევაც კი შეუძლია, სადაც შეუიარაღებელი თვალით ცხოველს ვერ შეამჩნევ.