რა ხდება: ისლანდიის ქალაქ გრინდავიკში სახლებს ცეცხლი წაეკიდა, მას შემდეგ, რაც ქალაქთან ახლოს ორი ვულკანური ნაპრალი გაიხსნა.

დეტალები: ვულკანი რეიკიანესის ნახევარკუნძულზე კვირას, გამთენიისას ამოიფრქვა, ლავამ მეთევზეების ქალაქამდე ჩააღწია.

  • ქალაქის მოსახლეობა ევაკუირებულია, ლავამ ქალაქის მთავარი გზა გადაკეტა.
  • ისლანდიის პრეზიდენტმა გუდნი იოჰანესონმა გუშინ საღამოს პირდაპირ ეთერში მიმართა ხალხს და მოუწოდა, "იდგნენ ერთად და თანაგრძნობა გამოიჩინონ მათ მიმართ, ვისაც საკუთარ სახლებში ყოფნა აღარ შეუძლია".
  • მან იმედი გამოთქვა, რომ მდგომარეობა დასტაბილურდებოდა, თუმცა, უშვებს, რომ "ყველაფერი შეიძლება მოხდეს".
  • ვულკანი ისლანდიაში დეკემბერშიც ამოიფრქვა, რასაც წინ ძლიერი მიწისძვრები უძღოდა. ამის შემდეგ ააშენეს დამცავი კედლები ვულკანის გარშემო, თუმცა ამოფრქვევას რამდენიმე მონაკვეთმა ვერ გაუძლო და ლავამ მიაღწია გრანდავიკამდე, სადაც 4 ათასამდე ადამიანი ცხოვრობს.
ქალაქი გრინდავიკი

ქალაქი გრინდავიკი

ფოტო: Reuters

  • სამეცნიერო ჟურნალისტმა და ვულკანოლოგმა რობინ ენდრიუსმა თქვა, რომ ეს ამოფრქვევა არის "უკიდურესად საშიში". BBC-სთან საუბრისას მან აღნიშნა, რომ ორი ნაპრალიდან ლავის ამოფრქვევა კვლავ ინტენსიურად მიმდინარეობს და ტემპის შენელება არ შეიმჩნევა.
  • მან, ასევე, თქვა, რომ ამოფრქვევის შედეგები შეიძლება აღმოჩნდეს "საკმაოდ მძიმე" ადამიანებისთვის, რომლებსაც აქვთ რესპირატორული პრობლემები, რადგან ვულკანური აქტივობა ათავისუფლებს გაზებს, როგორიცაა გოგირდის დიოქსიდი, ეს კი კანს, თვალებს, ცხვირსა და ყელს აღიზიანებს.


ბოლო ხაზი: კვირას მომხდარი ამოფრქვევა უკვე მეხუთეა, რომელიც მოხდა რეიკიანესის ნახევარკუნძულზე, 2021 წლის შემდეგ.

  • ისლანდია მდებარეობს შუა ატლანტიკურ ქედზე, ევრაზიისა და ჩრდილოეთ ამერიკის ტექტონიკური ფილების საზღვარზე. ეს არის ორი ყველაზე დიდი ფილა პლანეტაზე.
  • ისლანდიაში 33 აქტიური ვულკანური სისტემაა.