რა მოხდა: 25 დეკემბერს, მწერალთა სახლში, პრემია "მუზას" დაჯილდოებაზე, მწერალი ირაკლი კაკაბაძე კულტურის მინისტრს თეა წულუკიანს დაუპირისპირდა და პროტესტის ნიშნად, დაჯილდოება დატოვა.

  • "ვაჭარი მართავს მთავრობას. კარგად უნდა შეიგნოთ და დაიმახსოვროთ, [დავით] დოიაშვილს უნდა შეეშვა და სხვა ხელოვანებსაც უნდა შეეშვა", — მიმართა მან თეა წულუკიანს.
  • "კარგად დაიმახსოვრე და ისწავლე ჭკუა. იცი, რას გეტყვი მე შენ? ბიძინას გადაეცი, მაგ მათხოვარს, ახალგაზრდობაზე იფიქროს, მაგ "ბარიგას" და მაგ ვაჭრუკანას!" — ისმის ვიდეოში, რომელიც სოციალურ ქსელში ირაკლი კაკაბაძის დამ, ჟურნალისტმა ნინია კაკაბაძემ გაავრცელა.

დეტალები: მოგვიანებით, კიდევ ერთი ვიდეო კულტურის სამინისტრომ გაავრცელა და აღნიშნა, რომ ირაკლი კაკაბაძემ "სკანდალის მოწყობა" მას შემდეგ სცადა, რაც შეიტყო, რომ ჟიურიმ მას ლიტერატურული პრემია "მუზა" არ მიანიჭა.

  • "სამინისტრო წუხილს გამოთქვამს იმ უხერხულობის გამო, რომელიც, შესაძლოა, ირაკლი კაკაბაძის ქცევამ შეუქმნა შეკრებილ საზოგადოებას", — წერია კულტურის სამინისტროს ფეისბუქ გვერდზე.

კონტექსტი: კულტურის სამინისტრომ, პრემია "მუზა" დააარსა მას შემდეგ, რაც 2021 წელს მწერალთა სახლმა ლიტერატურული კონკურსის, "ლიტერას" ჩაშლის შესახებ განაცხადა — ამით, ავტორებმა პროტესტი გამოხატეს წულუკიანის რეპრესიული პოლიტიკის მიმართ.

  • ლიტერატურული პრემია "ლიტერა" 2015 წელს დაარსდა, ჟიურის ხუთ წევრს მწერალთა სახლი არჩევდა და კულტურის სამინისტროს უთანხმებდა. 2021 წლის 3 ივნისს, კულტურის სამინისტროს მიერ გამოცემული ბრძანებით, სამინისტროს მიერ დაფინანსებული ნებისმიერი კონკურსის ჟიურის შემადგენლობაში ერთი წევრი სამინისტროს წარმომადგენელი უნდა ყოფილიყო, რასაც ჟიურის წევრების და კონკურსანტების პროტესტი მოყვა.

გაიგე მეტი: წულუკიანის კულტურა

ბოლო ხაზი: მწერალი ირაკლი კაკაბაძე პრემია "მუზას" დაჯილდოებაზე წარდგენილი იყო, როგორც "წლის საუკეთესო პიესა/ინსცენირების" ერთ-ერთი ნომინანტი.