რა ხდება: პრეზიდენტმა უკვე დატოვა თავისუფლების მოედანი, სადაც საზეიმო ღონისძიება მიმდინარეობს.

  • მას სცენაზე სიტყვით გამოსვლის საშუალება დღეს არ მიეცა.

კონტექსტი: გუშინ, დღის ბოლოს, მას შემდეგ, რაც პრემიერ-მინისტრმა დღევანდელი ღონისძიება დააანონსა, საქართველოს პრეზიდენტმა განაცხადა, რომ ღონისძიებას თავადაც დაესწრებოდა, რადგან "ეს იქნებოდა საქართველოს ზეიმი და ყველა ერთად უნდა მდგარიყო".

  • "თუ ტრიბუნაზე მიმიწვევენ, კარგი, თუ არა — ხალხში ვიქნები. ერთად ვიზეიმებთ ხვალინდელ დღეს," — თქვა ზურაბიშვილმა გუშინ.
  • დღეს კი "ქართული ოცნების" თავმჯდომარემ, ირაკლი კობახიძემ განაცხადა, რომ პრეზიდენტს და ოპოზიციას "ზეიმზე და მით უმეტეს, სცენაზე, არაფერი ესაქმებათ".

რა ხდებოდა ღონისძიებაზე: მოსახლეობას "ქართული ოცნების" ლიდერებმა და ევროკავშირის ელჩმა მიმართეს.

  • მმართველი გუნდიდან, სამადლობელ განცხადებაში, არცერთს უხსენებია საქართველოს პრეზიდენტი.
  • პაველ ჰერჩინსკიმ კი საკუთარი გამოსვლა ქვეყნის პოლიტიკური ლიდერებისადმი, მათ შორის — სალომე ზურაბიშვილისადმი მიმართვით დაიწყო.
  • ღონისძიებას დღეს ოპოზიციის ნაწილიც ესწრებოდა.

„მადლობები არ მჭირდება, მადლობა არის ხალხის განწყობა, ხალხის მიზანმიმართულება და ერთად ყოფნა, ეს იქნება ჩვენთვის, ყველასთვის ბევრად მეტი, ვიდრე ერთმანეთში გაცვლილი მადლობები. არც მწყინს, არც მიხარია. მე მიხარია, ის, რაც აქ, ხალხში ხდება. ამ სიხარულს ვერავინ შემიცვლის ვერაფრით, ამიტომ ყველას კიდევ ერთხელ, გილოცავთ“, — თქვა პრეზიდენტმა, ვიდრე ღონისძიებას დატოვებდა.

ბოლო ხაზი: ევროკავშირის კანდიდატის სტატუსი საქართველოს გუშინ მიანიჭეს.