რა ხდება: მმართველმა პარტიამ, ქართულმა ოცნებამ კონტრაქტი გააფორმა მოშე კლუგჰაფტთან და მირი მიქაელთან, ისინი საარჩევნო პერიოდში პარტიის სტრატეგიული მრჩეველები იქნებიან.

  • ოცნების განცხადება პირველმა არხმა გაავრცელა.

დეტალები: განცხადებაში აღნიშნულია, რომ კლუგაფტი და მიქაელი ACT NEWS-ის დამფუძნებლები არიან.

  • ოცნების ინფორმაციით, მოშე კლუგჰაფტი არის საერთაშორისო სტრატეგიული მრჩეველი და კამპანიის მენეჯერი პოლიტიკური ლიდერებისა და პოლიტიკური პარტიებისთვის მთელ მსოფლიოში.
  • ის მუშაობდა პრემიერ-მინისტრ ნეთანიაჰუსთან და პრემიერ-მინისტრ ბენეტთან ისრაელში, ასევე ავსტრიის კანცლერთან, საბერძნეთის პრემიერ-მინისტრთან, სლოვაკეთის პრემიერ-მინისტრთან და სხვებთან.
  • მათივე ცნობით, მირი მიქაელი ბოლო 17 წლის განმავლობაში მუშაობდა ჟურნალისტად ისრაელის წამყვან ტელეარხებზე.
  • მიქაელი ასევე იყო ევროპული კორესპონდენტი ტერორისტული თავდასხმებისა და ISIS-ის აღზევების პერიოდში და ამ პერიოდის განმავლობაში მან ინტერვიუ ჩამოართვა მსოფლიოს ბევრ ლიდერს, მათ შორის ბორის ჯონსონს და ანგელა მერკელს.

კლუგჰაფტი მართავდა სალომე ზურაბიშვილის მეორე ტურის წინასაარჩევნო კამპანიას 2018 წელს, რომელშიც სალომე ზურაბიშვილმა მოიგო საპრეზიდენტო არჩევნები.

  • თუმცა, საარჩევნო ბანერებზე, სალომე ზურაბიშვილის ნაცვლად, ქართული ოცნების ლიდერები, მათ შორის — ბიძინა ივანიშვილი იყო გამოსახული.

///

"მან გვირჩია, რომ ჩაგვენაცვლებინა სალომე ზურაბიშვილის ბანერები ჩვენი ბანერებით, რაც გავითვალისწინეთ და რაც ძალიან სასარგებლო აღმოჩნდა. შესაბამისად, დაგვეხმარა შედეგის გაუმჯობესებაში", — თქვა დღეს ქართული ოცნების თავმჯდომარემ, ირაკლი კობახიძემ.

  • რაც შეეხება ე.წ. სისხლიან ბანერებს, რომლებიც თბილისისა და სხვა ქალაქების ქუჩებში 2021 წელს, თვითმმართველობის არჩევნების წინ გამოჩნდა, კობახიძე ამბობს, რომ ეს არ იყო კლუგჰაფტის იდეა, "თუმცა ეს ბანერები ძალიან კარგად ასახავდა „ნაცმოძრაობის“ სახეს".

"ჩვენი კამპანია იქნება თვისებრივად პოზიტიური, ჩვენ არსებითად ავაგებთ ამ კამპანიას იმაზე, თუ რა უნდა გაკეთდეს შემდეგი 4 წლის განმავლობაში ჩვენი ქვეყნის განვითარებისთვის. თუ საზოგადოებისთვის იმის შეხსენება დაგვჭირდება, ვინ არიან კოლექტიური ნაცმოძრაობის წევრები, რა თქმა უნდა, ამასაც გავაკეთებთ“, - თქვა დღეს კობახიძემ.