რა ხდება: რუსმა ოკუპანტებმა, ღამით, უკრაინაზე საჰაერო იერიში მიიტანეს. უკრაინის შეიარაღებული ძალების ცნობით, თავდასხმა მოხდა შაჰედ-136/131-ის ტიპის დრონებით და ბალისტიკური რაკეტებით. საჰაერო თავდაცვამ ყველა სამიზნე ჩამოაგდო.

  • მტრის თითქმის ყველა უპილოტო საფრენი აპარატი ჩამოაგდეს ოდესის ოლქში - სამხრეთ საჰაერო სარდლობის პასუხისმგებლობის ზონაში.

შეტევა კიევზე: 13 დეკემბრის ღამეს, 03:00 საათზე მტერმა სარაკეტო თავდასხმა განახორციელა კიევზე.

  • ათივე ბალისტიკური რაკეტა საზენიტო-სარაკეტო ქვედანაყოფმა ჩამოაგდო, თუმცა ნამსხვრევების ჩამოცვენის შედეგად, 53 ადამიანი დაშავდა.
  • კიევის მერის, ვიტალი კლიჩკოს ინფორმაციით, 20 დაშავებულის ჰოსპიტალიზება გახდა საჭირო, მათ შორის ორი ბავშვია.

რა ხდება ფრონტის ხაზზე: ვითარება კვლავ დაძაბულია. უკრაინის გენერალური შტაბი დილის მოხსენებაში იტყობინება, რომ მხოლოდ ავდეევკას რაიონში, ბოლო 24 საათის განმავლობაში, რუსეთის ჯარებმა 37 თავდასხმა განახორციელეს.

  • რუსი სამხედროები აგრძელებენ შეტევას ფრონტის სხვა სექტორებზე.
  • გენერალური შტაბის ინფორმაციით, ყველა თავდასხმა მოიგერიეს.