"პატრიარქის ნათლულები" - ეს არის ახალი წიგნი-ალბომი, რომელიც პატრიარქის ნათლულებისთვისაა განკუთვნილი და მისი ღირებულება 100 ლარია. პატრიარქის ნათლულთა რაოდენობა ამ ეტაპზე 28 ათასს აღწევს.

როგორც პატრიარქის საყოველთაო ნათლობის ორგანიზატორმა ლელა ჩუბინიძემ On.ge-ს განუცხადა, წიგნის გამოცემასთან მართლმადიდებელი ეკლესიის საპატრიარქოს კავშირი არ აქვს და ეს მთლიანად კონკრეტული იურიდიული პირის ინიციატივაა:

"ეს ჩვენ არ გვეხება, ამაზე ლაპარაკი იმიტომ გვიწევს, რომ ნათლულთა მონაცემები არის ჩვენთან ბაზაში და მათ არავის არ ვაძლევთ, ამის უფლება არ გვაქვს. სწორედ ამიტომ მოგვიწია ჩვენ საპატრიარქოს ამ ამბავში გარევა, თორემ ჩვენ საერთოდ არაფერ შუაში არ ვართ".

ლელა ჩუბინიძის თქმით, წიგნი-ალბომი დატვირთული იქნება ქადაგებებით, ინფორმაციით ნათლობის, ოჯახის სიწმინდისა და სხვა მსგავსი საკითხებით, წიგნში მოხვდება საქართველოს მართლმადიდებელი ეკლესიის კათალიკოს პატრიარქის, ილია მეორის ფოტოები, ასევე მისი ლოცვები და ამონარიდები ქადაგებებიდან.

ჯერჯერობით, წიგნი-ალბომი "პატრიარქის ნათლულები" შეზღუდული ტირაჟით გამოდის, თუმცა, როგორც ლელა ჩუბინიძე ამბობს, დაინტერესება მაღალია და არ არის გამორიცხული, მოთხოვნის შემთხვევაში, ხელახლა გამოიცეს:

"თავიდან ცოტა ტირაჟით დაიბეჭდა, რადგან ნამდვილად არ ეგონა [მას ვინც წიგნებს ბეჭდავს] ამხელა აჟიოტაჟს თუ გამოიწვევდა, ამიტომ თავიდან რაოდენობა შეზღუდულია, მაგრამ თუ ნათლულების მხრიდან იქნება დიდი მოთხოვნა, ის ეცდება რომ გულდაწყვეტილი არავინ დატოვოს, მაგრამ ამ ეტაპზე უკვე გაყიდულია დაბეჭდილი წიგნის დიდი ნაწილი".

ლელა ჩუბინიძისს თქმით, წიგნის შეძენას არავის არ დაავალდებულებენ და ეს იქნება ნებაყოფლობითი და ის შეიძენს, ვისაც ამისი სურვილი ექნება. მისივე განმარტებით, წიგნის ფასი თავიდან უფრო მაღალი უნდა ყოფილიყო, თუმცა საპატრიარქომ მოლაპარაკების შედეგად მოახერხა ფასის განახევრება. ჩუბინიძის ინფორმაციით, წიგნის დაბეჭდვის სურვილი გამომცემელს, პატრიარქის ნათლულთა მშობლების მხრიდან არსებული მოთხოვნის შემდეგ გაუჩნდა:

"ოჯახებისგან მოთხოვნა იყო ძალიან დიდი, ჩვენ ადრე ვხვდებოდით ოჯახებს სამებაში და სულ გვთხოვდნენ, რომ ყოფილიყო წიგნი, სადაც შევიდოდა ნათლულთა სახელები. წლების განმავლობაში მსგავსი წიგნი იმიტომ არ დაიბეჭდა, რომ სხვა გამომცემლობებსაც ჰქონდათ მისი დაბეჭდვის სურვილი, მაგრამ უფრო დიდ თანხაზე იყო ლაპარაკი და ამიტომ მათ უარი უთხრეს".

როგორც საყოველთაო ნათლობის ორგანიზატორმა გვითხრა, წიგნ-ალბომში იქნება პატრიარქის ნათლულის ფოტოს ჩასაკრავი და სახელის ჩასაწერი ადგილი.

სპეციალურად მომზადებულ ვებგვერდზე, სადაც წიგნის შესყიდვის მსურველები წინასწარ უნდა დარეგისტრირდნენ, აღნიშნულია, რომ "პატრიარქის ნათლულები" გამომცემლობა საოჯახო ბიბლიოთეკამ (სააქციო საზოგადოება საქპრესა) გამოსცა.

პატრიარქმა მართლმადიდებელ ოჯახში დაბადებული ყოველი მესამე ბავშვის მონათვლა 2008 წელს დაიწყო. მას შემდეგ საყოველთაო ნათლობა რეგულარულად იმართება.