BBC-ის დაკარგული ინტერვიუ, რომელშიც ბენქსი თავის ნამდვილ სახელს ამხელს, ჩაწერიდან 20 წლის შემდეგ აღმოაჩინეს. ინტერვიუში ბენქსი ხელოვნებისა და თავისი სტილის შესახებ საუბრობს, ბოლოს კი ჟურნალისტთან თავის ნამდვილ სახელს აზუსტებს.

ჟურნალისტმა ქუჩის მხატვარს ჰკითხა, იყო თუ არა რობერტ ბენქსი მისი სახელი და გვარი, მან კი უპასუხა, რომ რობი ჰქვია. მართალია, ბენქსი თავის ვინაობას დიდი ხანია, აღარ ამჟღავნეს, თუმცა გულშემატკივრებმა უკვე მისი ნამდვილი სახელი იციან და ინტერვიუში მხატვრის ხმის მოსმენაც შეუძლიათ.

ბენქსიმ ინტერვიუ BBC-ის ჟურნალისტ ნაიჯელ ვრენჩთან 2003 წლის ზაფხულში ჩაწერა. სწორედ ამ პერიოდში ლონდონში Banksy's Turf War შოუ იხსნებოდა და ინტერვიუს მთავარი თემაც ეს იყო. ინტერვიუს რედაქტირებული ვერსია ივლისში BBC-ის რადიოს პირდაპირ ეთერში გავიდა. წლების შემდეგ ნაიჯელ ვრენჩი ბენქსის შესახებ პოდკასტს უსმენდა და გაიხსენა, რომ ინტერვიუს სრული ვერსია საკუთარ სახლში ჰქონდა შენახული, შემდეგ კი გამოქვეყნება გადაწყვიტა.

ფოტო: Getty Images

ბენქსი ერთ-ერთია იმ მხატვართაგან, რომელსაც მედიაც და სოციალური ქსელებიც ხშირად "იდუმალ" ადამიანად მოიხსენიებს. ამასთანავე, მხატვრის სახელის შესახებ აქამდეც არაერთ ვერსიაზე მსჯელობდნენ, ახლა კი ვარაუდების ნაცვლად, ფანებმა მისი ნამდვილი სახელი იციან.

ბენქსიმ ქუჩის მხატვრობით სახელი წლების წინ გაითქვა. ნამუშევრებისთვის ბენქსი ძირითადად აქტუალურ პოლიტიკურ და კულტურულ თემებს ირჩევს, რომელიც მნახველს გულგრილს ვერასდროს ტოვებს. ამასთანავე, მხატვრის გამორჩეული სტილიც მისი გულშემატკივრების დიდი მოწონებას იმსახურებს.