მოკლედ: "მოგვიწია ახლის ყიდვა", — თქვა თბილისის მერმა, კახა კალაძემ დედაქალაქის მთავრობის სხდომაზე თბილისის საახალწლო ნაძვის ხის შესახებ, "ვინაიდან გასულ წელს ფოიერვერკის გასროლის შედეგად ცეცხლი გაუჩნდა და დაზიანდა".

რა დაუჯდება ახალი ნაძვის ხე ბიუჯეტს: 780 000 ლარი.

ტენდერი მოიგო: ღამის შოუ სტუდიამ, აუქციონის გარეშე.

  • შესაბამისი ტენდერი შსპ თბილსერვის ჯგუფმა 12 სექტემბერს გამოაცხადა.
  • ღამის შოუ სტუდიამ 15 ნოემბრამდე უნდა უზრუნველყოს მიწოდება.

დეტალები: დანართის მიხედვით, თბილისის ნაძვის ხე უნდა იყოს:

  • 24 მეტრის სიმაღლის,
    ორ სეგმენტიანი;
    365 ტოტით, 120 ცალი ფარდა განათებით, გრძივად აწყობილი ბურთებით, 10-მეტრიანი 3D კონტურული ვარსკვლავით, ბურთებითა და მოგრძო ფორმის სათამაშოთი.

რა ვიცით შსპ ღამის შოუ სტუდიას შესახებ?

  • დაარსდა 2007 წელს და 2013 წლამდე ტელეიმედის დაკვეთით ქმნიდა სიტკომს "შუა ქალაქში".
  • 2013 წლიდან მონაწილეობას იღებენ ელექტრონულ შესყიდვებში.
  • თბილსერვისისგან საახალწლო განათებებთან დაკავშირებული შესყიდვა მოიგო წინა წლებშიც.

მონაცემებში:

  • 2013-20 წლებში სახელმწიფო შესყიდვების გზით 323 865 ლარი მიიღო, აქედან 220 621 ლარი — უკონკურენტოდ.
  • 2012-2020 წლებში ღამის შოუს სტუდიამ 1 148 825 ლარის ღირებულების ხელშეკრულება გააფორმა სახელმწიფო სტრუქტურებთან პირდაპირი შესყიდვის გზით.
  • 2018 წლის დეკემბერში თბილსერვის ჯგუფმა 149 180 ლარის ხელშეკრულება გაუფორმა კომპანიას ასევე, საახალწლო განათებებისთვის.

ბოლო ხაზი: ღამის შოუ სტუდიას მომსახურებით ძირითადად სარგებლობენ საზოგადოებრივი მაუწყებლის აჭარის ტელევიზია და თბილისის მერია.