ლომი, რომელიც იტალიის ქალაქ ლადისპოლის ცირკიდან გაიქცა, ახლახან რომთან ახლოს დააკავეს. პოლიციის განცხადებით, ლომი მინიმუმ 5 საათის განმავლობაში ქალაქში თავისუფლად დასეირნობდა და მისმა დანახვამ არაერთი ადგილობრივი შეაშინა.

"ლომი დაიჭირეს და დროებით დააძინეს, შემდე კი ცირკის თანამშრომლებს ჩააბარეს. მადლობას ვუხდი პოლიციას, სახანძრო დეპარტამენტს, ადგილობრივ ჯანდაცვასა და ყველა მოხალისეს, რომელიც ამ მძიმე საათებში გაერთიანდა. იმედი მაქვს, ეს შემთხვევა სინდისზე იმოქმედებს და ცირკებში ცხოველების ექსპლუატაცია საბოლოოდ დასრულდება", — განაცხადა ლადისპოლის მერმა.

მას შემდეგ, რაც ლომი ცირკიდან გაიქცა, ის ლადისპოლის ქუჩებში დასეირნობდა, რომელიც ზღვისპირა ქალაქია და რომიდან დაახლოებით 50 კილომეტრში მდებარეობს. ადგილობრივებს სახლიდან გამოსვლა ეკრძალებოდათ, ზოგიერთმა მათგანმა კი ლომს, რომელმაც მათთან ახლოს ჩაიარა, ვიდეოები გადაუღო.

როგორც ცირკის თანამშრომლები აცხადებენ, ყვირილი შემოესმათ, შემდეგ კი დაინახეს, რომ ცირკიდან ადამიანები გარბოდნენ, რადგან ერთ-ერთი ლომის გალია ღია იყო. ლომი საბოლოოდ რომთან ახლოს შენიშნეს, შემდეგ კი პოლიციამ და ვეტერინარებმა ცირკში უსაფრთხოდ გადაიყვანეს.