ალტე უნივერსიტეტის მასშტაბური სასკოლო Start-up მარათონი იწყება

ალტე უნივერსიტეტის უნიკალური კონცეფციის პროექტი — მასშტაბური სასკოლო Start-up მარათონი ბრუნდება, რომელიც განკუთვნილია მე-10, მე-11 და მე-12 კლასის მოსწავლეებისთვის და მასში მონაწილეობა მოსწავლეებს შეუძლიათ როგორც ინდივიდუალურად, ასევე გუნდურად საქართველოს ნებისმიერი რეგიონიდან.

პროექტის მიზანია, დაეხმაროს Start-up იდეის მქონე მოსწავლეებს, გაიგონ მეტი ანტრეპრენერობის პრინციპების შესახებ და მენტორების მხარდაჭერით, რეალობად აქციონ ან განავითარონ საკუთარი იდეა.

პროექტი ხორციელდება ალტე უნივერსიტეტის Start-up გარაჟის, ბიზნესის სკოლისა და IT სკოლის ერთობლივი თანამშრომლობით. პროექტის მხარდამჭერები კი არიან თიბისი ახალი თაობისთვის, თიბისი სტარტაპერი, საქართველოს ინოვაციებისა და ტექნოლოგიების სააგენტო (GITA) და მედიაპორტალი Entrepreneur.

გამარჯვებულ და რჩეულ გუნდებს გადაეცემათ სიმბოლური და ფულადი პრიზები, როგორც ალტე უნივერსიტეტისგან, ასევე მისი პარტნიორი ორგანიზაციებისგან.

ამ შესაძლებლობასთან დაკავშირებით ალტე უნივერსიტეტის ბიზნესის სკოლის დეკანს გიორგი აბაშიშვილს ვესაუბრეთ, რომელიც დაახლოებით 20 წელია, რაც ამ მიმართულებით მუშაობს და ასწავლის.

რამდენად მნიშვნელოვანია ანტრეპრენერობისთვის საჭირო უნარების ადრეული ასაკიდანვე განვითარება?

ალტე უნივერსიტეტის ერთ-ერთი მთავარი მიზანი ახალგაზრდებში ანტრეპრენერობის წახალისება და მეწარმეობის კულტურის ჩამოყალიბებაა. განსაკუთრებით საინტერესოა სკოლის მოსწავლეებთან მუშაობა, რადგან ისინი ნაკლებად ექცევიან ჩარჩოებში და თავისუფალი, ლაღი, ინოვაციური და უნიკალური იდეებით გამოირჩევიან.

როცა სკოლის მოსწავლე ვიყავი, გარშემომყოფები ტრადიციული კარიერული გზების გაყოლას და ჩემი შესაძლებლობების წინასწარ განსაზღვრული პროფესიებით შეზღუდვას მირჩევდნენ. ასეთმა მიდგომამ შესაძლოა, მეწარმეული და ნოვატორული სულისკვეთება გადაფაროს. სინამდვილეში კი — იმაზე ამაღელვებელი არაფერია, როცა შეგიძლია, თავად შექმნა რაიმე ღირებული და ინოვაციური და შენი იდეის გარშემო ბევრი საინტერესო ადამიანი გააერთიანო.

ასევე მნიშვნელოვანია, ის თავისუფლება, რომელიც სკოლის მოსწავლეებს აქვთ, სწორად განვავითაროთ და ხელი შევუწყოთ მათი იდეების განვითარებას. ამ პროექტის მთავარი მიზანი სწორედ ეს არის — არ დარჩეს იდეები განუხორციელებელ პროექტებად და პროგრესულ თაობას ჰქონდეს ადგილი, სადაც თავიანთი იდეების დახვეწაში, ფორმირებასა და პრაქტიკულ რეალიზებაში დაეხმარებიან.

უნდა აღინიშნოს ისიც, რომ პროექტი უკვე მეორედ ხორციელდება და მოსწავლეების მაღალი დაინტერესებიდან გამომდინარე გაცილებით მეტ აქტიურობას ველით.

რატომ მე-10, მე-11, მე-12 კლასელები?

მე-10, მე-11, მე-12 კლასის მოსწავლეებს ჯერ კიდევ არ აქვთ პროფესია არჩეული, ისინი ჯერ კიდევ ძიების პროცესში არიან. ამ პროექტმა კი შესაძლოა, მოსწავლეები სხვადასხვა მიმართულებით დააფიქროს, რათა უფრო რაციონალურად შეძლონ კარიერული დაგეგმვა და განვითარება.

ამასთან, სკოლის მოსწავლეებმა უნდა იგრძნონ, რომ მათ აქვთ შესაძლებლობა, ახლავე წამოიწყონ ბიზნესი და არაა აუცილებელი, დაელოდონ წლების გასვლას. ანტრეპრენერები ასე არ იქცევიან, მეწარმეობას არ გააჩნია ასაკი, იდეას მხოლოდ სწორი მიმართულება და პარტნიორები სჭირდება, რათა დაუყოვნებლივ განხორციელდეს.

რა სახის მხარდაჭერას მიიღებენ მონაწილეები?

ჩვენი მხრიდან არანაირი ტიპის შეზღუდვა არ არსებობს მათ შორის, არ გვაქვს წინასწარ განსაზღვრული ინტელექტუალური ან ფინანსური მხარდაჭერა. მთავარია, იდეა იყოს ინოვაციური, უნიკალური და განვითარებაზე ორიენტირებული. თუმცა, რა თქმა უნდა, რჩეული გუნდებისთვის დაწესებულია სპეციალური პრიზები, როგორც ალტე უნივერსიტეტის, ასევე პარტნიორი კომპანიების მხრიდან. თიბისი ახალი თაობისთვის და თიბისი სტარტაპერი რჩეულ გუნდს 5000 ლარს გადასცემს ბიზნესიდეის გასავითარებლად, ალტე უნივერსიტეტი რჩეული გუნდის წევრებს სწავლას ალტე უნივერსიტეტში სრულად დაუფინანსებს, GITA რჩეულ გუნდს პროტოტიპის დამზადებაში დაეხმარება, ხოლო Entrepreneur მისი მედიამხარდამჭერი გახდება.

პროექტის მონაწილე გუნდებს ექნებათ ინტენსიური ტრენინგები კვალიფიციურ მენტორთან. ტრენინგების შემდეგ მათ უნდა დაიწყონ მზადება იდეების წარსადგენად და იმუშაონ პრეზენტაციებზე. ამ პროცესშიც უნივერსიტეტის მხრიდან, მათ ეყოლებათ მენტორები, რომლებიც დაეხმარებიან მაქსიმალურად ეფექტური პრეზენტაციების მომზადებაში.

რა სარგებელს მიიღებენ პროექტის მონაწილეები?

ალტე უნივერსიტეტის ხელშეწყობით, სკოლის მოსწავლეებს შესაძლებლობა ეძლევათ, ყველაფერი ერთ სივრცეში მიიღონ. მათ არ მოუწევთ სხვადასხვა ეტაპების სხვადასხვა დაწესებულებებში გავლა ან პარტნიორების ძიება. პროექტის მონაწილეებს იდეის ფორმირებიდან რეალიზაციის ეტაპამდე სრულ მხარდაჭერას ვუცხადებთ.