საქართველოს შს მინისტრმა, გიორგი მღებრიშვილმა, საქართველოდან გატაცებული აზერბაიჯანელი ჟურნალისტის, აფგან მუხტარლის საქმეზე, იმედის კვირასთან ექსკლუზიური ინტერვიუს დროს ისაუბრა.

"ამოვიღეთ ყველა ვიდეოჩანაწერი, რომელზეც მუხტარლის ადვოკატმა მიგვითითა, თითოეული მათგანის ანალიტიკური დამუშავება ხდება. სხვათაშორის გადავეცით მუხტარლის ადვოკატსაც, მაგრამ მას ისინი არ მოეწონა, რადგან მათზე არ ჩანს გატაცების მომენტი, ჩვენ ხელოვნურად ვერ დავდგამთ გატაცების სცენებს და მისთვის სასურველ სცენებს ვერ დავდგამთ, ობიექტურად რა მოცემულობაც გაქვს, მივყვებით მას. ვითომ გულშემატკივრებს და ვითომ აღშფოთებულებს მინდა ვუთხრა, რომ გამოძიება აუცილებლად დასრულდება და ჩვენ დავდებთ მის შედეგს".

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.