საგანგებო სიტუაციების მართვის სამსახურმა ხუთი უცხოელი ტურისტი შატილის ხეობიდან გამოიყვანა. ტურისტების გამოყვანის შესახებ ინფორმაციას შინაგან საქმეთა სამინისტრო ავრცელებს.

უწყების ინფორმაციით, მცხეთა-მთიანეთის რეგიონში, შატილის ხეობაში, ძლიერი წვიმის შედეგად ადიდებულმა მდინარემ ტურისტებს გზის გაგრძელების საშუალება აღარ მისცა და მათ დახმარება სჭირდებოდათ, უცხოელთა 17 კაციანი ჯგუფიდან ხუთი ტურისტის პოვნა ვერ ხერხდებოდა.

"შეტყობინების მიღებისთანავე, შემთხვევის ადგილისკენ დუშეთის სახანძრო-სამაშველო ჯგუფი გაემართა. რთული რელიეფური და კლიმატური პირობების გამო, ტრანსპორტით გადაადგილება ვერ მოხერხდა და მაშველებმა დაკარგული ტურისტების ძებნა ქვეითად განაგრძეს. ამინდის გაუმჯობესებისთანავე, სამაშველო ღონისძიებაში შსს-ს სასაზღვრო პოლიციის ვერტმფრენი ჩაერთო," - აღნიშნავენ შსს-ში და დასძენენ, რომ მოგვიანებით, მაშველებმა ტურისტებთან კომუნიკაციის დამყარება და მათი ზუსტი ადგილსამყოფელის დადგენა შეძლეს.