მოკლედ: დღეს, 27 ოქტომბერს, საქართველოს მესამე პრეზიდენტმა, მიხეილ სააკაშვილმა სასამართლოს კლინიკა ვივამედიდან პირდაპირი ჩართვის საშუალებით, ჩვენება მისცა. საქმე 7 ნოემბრის მოვლენების გამოძიებას ეხება.

რას ედავებიან: პროკურატურის მიხედვით,

• მომიტინგეთა მასობრივად დარბევას,
• იმედში შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას.
• ამ საქმეზე წარდგენილი ბრალი 5-დან 8 წლამდე ვადით თავისუფლების აღკვეთას ითვალისწინებს.

რას ამბობს ამ საქმეზე სააკაშვილი:

• "დღევანდელ სასამართლოსთან პირდაპირ კავშირშია ის, რომ ვლადიმერ პუტინმა, დსთ-ს ნარჩენების სხდომაზე, დამადანაშაულა, რომ დსთ მე დავუშალე. მე ვამაყობ იმით, რომ ამაში მართლაც მიმიძღვის წვლილი და ეს პირდაპირ უკავშირდებოდა იმ მოვლენებს, იმ პერიოდს, რომელსაც თქვენ არჩევთ ამ სისხლის სამართლის ე.წ საქმის განხილვისას.
• იცით, რომ ვლადიმერ პუტინი არის საქართველოს დაუძინებელი მტერი, საქართველოს ტერიტორიის დამპყრობელი და მისი მხრიდან ჩემი ასეთი პირდაპირი დადანაშაულება, კონკრეტულად მიუთითებს თუ ვისი მითითებით არის ეს საქმე აღძრული.
• მაშინდელი მთავარი პროკურორი, ახლა არის სანქცირებული [ოთარ ფარცხალაძე], როგორც ფსბ-ს აგენტი და ყველაფერი გასაგებია, თუკი ვინმეს რაიმეს გაგება უნდა", — უთხრა სასამართლოს სააკაშვილმა.

პოლიტიკური გზავნილები:

• საქართველოში ჩამოსვლის შემდეგ, რასაც მისი პატიმრობა მოჰყვა, სხვადასხვა დროს, ის იცვლიდა პოზიციებს ქართულ პოლიტიკაში მონაწილეობასთან დაკავშირებით.
• დღეს, სააკაშვილმა თქვა, რომ არსად წავა, "თუნდაც 500 გისოსი მიამაგრონ და იბრძოლებს ქართული სახელმწიფოსთვის."
• "როგორც არ უნდა შეეცადონ ჩემს გაჩუმებას, იქნება ეს კლინიკაში, თუ ციხეში, თუ მთავარია, საქართველოში ვარ და აქტიურად ვაპირებ ვიყო ჩართული საქართველოს გადარჩენის პროცესში", — კლინიკა ვივამედიდან სააკაშვილის ამ მიმართვას სასამართლოს დარბაზში მხარდამჭერებისგან ტაში მოჰყვა.

რა უთხრა ოპოზიციას: მესამე პრეზიდენტმა, ოპოზიციურ ძალებს კოორდინაციისკენ მოუწოდა და თქვა, რომ დროა, ერთმანეთზე შეტევებს დაანებონ თავი.

• "ამ სისტემის შეცვლას უნდა მივაღწიოთ ყველამ ერთად. ჩვენ არ გვჭირდება ერთ პარტიაში ყოფნა, არ გვჭირდება დავაქორწინოთ ერთმანეთთან სხვადასხვა პარტიები, პოლიტიკური ჯგუფები, თუ პიროვნებები, უბრალოდ, გვჭირდება მივაღწიოთ ამ სისტემის შეცვლას ერთობლივი ქმედებებით", — თქვა მან და აღნიშნა, რომ მნიშვნელოვანი იქნება, 2024 წლის საარჩევნო ხმების დათვლაში ევროკავშირის პირდაპირი ჩართვა და მონაწილეობა.
• რა თქვა ელექტრონულ არჩევნებზე: რომ "დღეს, ელექტრონული სისტემა, თავიდან ბოლომდე გათვლილია გაყალბებაზე. დარეკავს ის კაცი შუშის სასახლიდან, უბრძანებს თამარ ჟვანიას და დაწერენ იმ ციფრს, რომელიც მათ უნდათ. ჩვენ უნდა შევაცვლევინოთ ეს სისტემა, ყველამ ერთად უნდა ვიბრძოლოთ."

ბოლო ხაზი: გუშინ, 26 ოქტომბერს, სააკაშვილის ჯანმრთელობის მდგომარეობის შესახებ, ომბუდსმენის კონსილიუმმა გამოაქვეყნა დასკვნა და დაწერა, რომ სააკაშვილის მდგომარეობის გათვალისწინებით, მას სამედიცინო მეთვალყურეობა ესაჭიროება.

სისუსტე, კუნთების ატროფია და მეხსიერების გაუარესება — რა დაწერა ომბუდსმენის კონსილიუმმა სააკაშვილის ჩივილებზე