აშშ-ის 2 ქალაქში ლოკდაუნი გამოცხადდა — პოლიცია, მეინის შტატში ეძებს თავდამსხმელს, რომელმაც ქალაქ ლუისტონში, რესტორანსა და ბოულინგ-კლუბში 16-დან 22 ადამიანამდე მოკლა, ათობით კი დაჭრა.

  • დაღუპულთა ზუსტი რაოდენობა ცნობილი არ არის, CNN-ს ქალაქის ადგილობრივ ხელისუფლებაში განუცხადეს, რომ დაღუპულთა რაოდენობა 22-ს აღწევდა, თუმცა ეს ცნობა, ჯერჯერობით, სამართალდამცავ უწყებებს არ დაუდასტურებიათ.
  • ლუისტონის გარდა, ლოკდაუნი მოქმედებს ახლოს მდებარე ქალაქ ბოუდუინში.

რას ამბობს პოლიცია: სამართალდამცავებმა განცხადება გაავრცელეს, სადაც წერია, რომ მოსახლეობა უნდა დარჩეს სახლებში, დაკეტილი იქნება სკოლებიც.

  • "100-ზე მეტი ადგილობრივი და ფედერალური გამომძიებელი მუშაობს, რომ იპოვონ რობერტ კარდი, რომელიც ლიუსტონის სროლის საქმეზე იძებნება," -წერია პოლიციის განცხადებაში.
  • მანამდე, პოლიციამ X-ზე (ყოფილი ტვიტერი) დაწერა, რომ 40 წლის კარდი ბოუდუინში ცხოვრობს.
  • კაცი, რომელსაც სამართალდამცველები ეძებენ, ცეცხლსასროლი იარაღიდან სროლის სერტიფიცირებული ინსტრუქტორია და ირიცხება აშშ-ის არმიის რეზერვში.