თბილისის საკრებულოს დეპუტატმა, ალეკო ელისაშვილმა ჟურნალისტებს განუცხადა, რომ ის 11 ივლისიდან იწყებს საარჩევნო კამპანიას. ამის შესახებ მან აშშ-ის საელჩოში, დამოუკიდებლობის დღისადმი მიძღვნილ ღონისძიებაზე ისაუბრა. ელისაშვილი მიიჩნევს, რომ მმართველი პარტიის კანდიდატი, კახა კალაძე არ არის უალტერნატივო და იგი საკუთარ შესაძლებლობებში დარწმუნებულია:

"უალტერნატივო ჩემთვის არის ღმერთი, კახი კალაძე კი არა ყველას ჰყავს ალტერნატივა. მე როგორც თბილისის მერობის დამოუკიდებელი კანდიდატი, გუდიაშვილის მოედანზე დავიწყებ ჩემს კამპანიას. ყველაფერი ოქტომბერში გამოჩნდება, თუმცა მე რომ არ ვიყო დარწმუნებული საკუთარ გამარჯვებაში და შესაძლებლობებში, გასართობად ჩემს კანდიდატურას არ დავაყენებდი. სამშაბათიდან მე დავიწყებ ბრძოლას გამარჯვებისთვის".

საქართველოში თვითმმართველობის არჩევნები 2017 წლის ოქტომბრის ბოლოს გაიმართება. ალეკო ელისაშვილი თბილისის მერობისთვის იბრძოლებს, კახა კალაძესთან, ელენე ხოშტარიასთან და ზალიკო უდუმაშვილთან ერთად.