შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა ქეთევან ციხელაშვილმა, გერმანიაში ვიზიტისას, გამყოფ ხაზზე საოკუპაციო ძალის მიერ ბოლო დღეებში დამდგარ მავთუხლართებისა და სხვა ხელოვნურ ბარიერებზე ისაუბრა.

"ბანერები და მავთულხლართები არის ხელშესახები ნაწილი და გაგრძელება ოკუპაციისა. ხელოვნური ბარიერების აღმართვა საქართველოს ტერიტორიაზე ჯერ კიდევ 2009 წელს დაიწყო. საოკუპაციო ძალის ქმედებები არის გამოწვევა უსაფრთხოების კუთხით არა მხოლოდ საქართველოსთვის, არამედ მთლიანად რეგიონისთვის, ამასთან, ამძიმებს და ართულებს ადგილობრივი მოსახლეობის ჰუმანიტარულ მდგომარეობას", - განაცხადა ქეთევან ციხელაშვილმა.

მინისტრის განცხადებით, საქართველოს პასუხი ამ სახის პროვოკაციებზე, ერთის მხრივ, სამშვიდობო და პრაგმატული პოლიტიკაა, რომლის ერთ-ერთი ძირითადი მიმართულება და ამოცანა კონფლიქტით დაზარალებული მოსახლეობის მდგომარეობის გაუმჯობესება და შემსუბუქებაა.

"საოკუპაციო ძალის მხრიდან პროვოკაციების პრევენციის, ასევე დაზარალებულ მოსახლეობაზე ზრუნვის მიმართულებით, განსაკუთრებული მნიშვნელობა აქვს საერთაშორისო თანამეგობრობის და პარტნიორების მხარდაჭერას და ჩვენ აქტიურად და რეგულარულად ვმუშაობთ საერთაშორისო მხარდაჭერის კიდევ უფრო მობილიზებისა და კონსოლიდირებისთვის. სწორედ ეს არის ჩემი ამჟამინდელი ვიზიტის მთავარი მიზანიც - მაქსიმალური ინფორმაცია მივაწოდო ჩვენს პარტნიორებს გამყოფ ხაზებზე და ოკუპირებულ ტერიტორიებზე არსებული ვითარების, საქართველოს მთავრობის სამშვიდობო მიდგომების შესახებ“, - აცხადებს სახელმწიფო მინისტრი.

ინფორმაციას შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი აქვეყნებს. მათი ინფორმაციით, ქეთევან ციხელაშვილი გერმანიაში ორდღიანი ვიზიტით იმყოფება.