რატომ არის მნიშვნელოვანი: 7 ოქტომბერს, ადგილობრივი დროით 06:30 საათზე, ღაზადან ისრაელის მიმართულებით რამდენიმე სარაკეტო თავდასხმა განხორციელდა.

  • ამაზე პასუხისმგებლობა დაჯგუფება ჰამასმა აიღო. მათი თქმით, ეს არის შურისძიება ისრაელის მიერ ალ-აქსას მეჩეთის შეურაცხყოფის გამო.
  • ისრაელის თავდაცვის ძალებმა ჯარისკაცების მობილიზება დაიწყეს და საომარი მდგომარეობა გამოაცხადეს.
  • მალე გავრცელდა ინფორმაცია, რომ ჰამასმა ისრაელის სამხედროები და მათ შორის, სამოქალაქო პირებიც მძევლად აიყვანა და ღაზის სექტორში გადაიყვანა.
  • მოგვიანებით, ეს ინფორმაცია დაადასტურა ჰამასმაც და ისრაელის თავდაცვამაც.
  • სროლები იყო ღაზა-ისრაელის საზღვრის იმ ნაწილშიც, სადაც მუსიკალური ფესტივალი მიმდინარეობდა.
  • თავდასხმის შედეგად ფესტივალის მონაწილეების ნაწილი დაიღუპა, ნაწილი ჰამასის წევრებმა მძევლად აიყვანეს. ზოგმა გაქცევა და დამალვა მოახერხა.
  • ბოლო ოფიციალური მონაცემებით, ისრაელში, ჰამასის თავდასხმის შედეგად დაღუპულთა 900-ზე მეტი ადამიანი, დაშავებულია 3000-მდე.
  • ისრაელის კონტრშეტევის შედეგად კი, ბოლო მონაცემებით, დაიღუპა 600-მდე პალესტინელი.

დეტალები: ისრაელში იმყოფებიან საქართველოს მოქალაეებიც, რომელთა ნაწილს მიმდინარე მოვლენების გამო ქვეყნის დატოვა სურს.

  • ისრაელში მყოფი ქართველები ტელევიზიებთან ევაკუაციის სირთულეებზე საუბრობენ.
  • ბოლო დღეების განმავლობაში, მოქალაქეები სოციალურ ქსელში წერდნენ, რომ ისრაელზე თავდასხმის შემდეგ საქართველოს ავიახაზების ბილეთები გაძვირდა, რამაც საზოგადოებაში უკმაყოფილება გამოიწვია.
  • კრიტიკის საპასუხოდ, ავიაკომპანია ჯორჯიან ეარვეისმა განცხადება გამოაქვეყნა, რომელშიც ამტკიცებს, რომ გავრცელებული ინფორმაცია სიმართლეს არ შეესაბამება და ეს არის "ნამდვილი ეკონომიკური შპიონაჟი".
  • "ამ მიმართულებაზე მძაფრი კონკურენციაა, რაც ბილეთის ფასებზე ყოველგვარ ხელოვნურ ჩარევას გამორიცხავს", — აღნიშნულია მათ განცხადებაში.

საქართველოს ელჩმა ისრაელში, ლაშა ჟვანიამ განაცხადა, რომ ისრაელიდან საქართველოს მიმართულებით 11 ოქტომბრისთვის დამატებითი რეისი დაინიშნა, თუმცა ამჟამად ყველა ბილეთი გაყიდულია.

  • მისი თქმით, ყველა ბილეთი "15-20 წუთში გაიყიდა".
  • ელჩმა დღეს თქვა, რომ ახალი რეისის დანიშვნაზე მუშაობენ.
  • "ჩვენ ვმუშაობთ როგორც აირზენასთან, ისე ისრაელის მხარესთან, რომ დამატებითი რეისი დაინიშნოს 12 ოქტომბრისთვის. მიაქციონ ყურადღება ჩვენმა მოქალაქეებმა. ინტერნეტით იქნება ბილეთების გაყიდვა", — ამბობს ჟვანია.
  • გარდა ამისა, ის აღნიშნავს, რომ ისრაელში არცერთი ქალაქიდან ევაკუციის გეგმა არ არის მიღებული და წესების დაცვის შემთხვევაში, იქ ყოფნა უსაფრთხოა.

საჭიროების შემთხვევაში, საქართველოს მოქალაქეებს შეუძლიათ დარეკონ საელჩოს ცხელ ხაზზე:

  • +972526919092
  • +972 52-8888513
  • +972 54-7386813