წარმოშობით ქართველი ბრიტანელი მუსიკოსი ქეთი მელუა თავისი სადებიუტო ალბომის 20 წლის იუბილეს აღსანიშნავად მის განახლებულ ვერსიას გამოუშვებს. ალბომი Call Off The Search, რომელიც მომღერალმა 2003 წელს, 19 წლის ასაკში გამოაქვეყნა, ცნობილი მუსიკოსების — მაიკ ბეთის, ჯონ მეიოლის, რენდი ნიუმენისა და ჯეიმს შელტონის — დაწერილ კომპოზიციებს აერთიანებს.

"ეს ალბომი 2002 წელს მაიკ ბეთთან ერთად ჩავწერე, როცა BRIT School-ში ვსწავლობდი", — წერს ქეთი მელუა ინსტაგრამზე, — "ძალიან პატარა ქეთის მაშინ ვერც კი წარმოედგინა, რომ ალბომი ბრიტანულ ჩარტებში ექვსი კვირის განმავლობაში დაიკავებდა პირველ ადგილს. ასე გავხდი დამოკიდებული სიმღერების წერაზე. საოცარია, რომ 20 წლისა და 8 ალბომის გამოშვების შემდეგაც კი ჩემს საყვარელ საქმეს ვაკეთებ".

ქეთის თქმით, ალბომის განახლებული ვერსია აქამდე უცნობ 7 დაუმუშავებელ ჩანაწერსაც მოიცავს. ამასთან, იუბილეს აღსანიშნავად, სიმღერებზე გადაღებული ვიდეოკლიპები მაღალ ხარისხში აიტვირთება იუთუბზე.

Call Off the Search გამოშვებიდან პირველი ხუთი თვის განმავლობაში 1,8 მილიონ ასლად გაიყიდა და ექვსგზის მიიღო პლატინის სტატუსი. ის ყველა დროის ყველაზე გაყიდვადი ბრიტანული ალბომების ასეულშიც შედის.

ქეთი მელუა ერთ-ერთი ყველაზე წარმატებული ბრიტანელი მომღერალია, რომელსაც ამ დრომდე ჯამში ცხრა სტუდიური ალბომი აქვს გამოშვებული. ზედიზედ ორი წლის განმავლობაში მელუა გაერთიანებულ სამეფოში ყველაზე გაყიდვადი ჩანაწერების მქონე მუსიკოსი ქალი იყო. 2008 წელს ქეთი 30 წლის ასაკს ქვემოთ მე-7 ყველაზე მდიდარ ბრიტანელ მუსიკოსად დასახელდა. 2021 წელს მელუამ ევროპის კულტურის ჯილდოც მიიღო.

Call Off the Search-ის განახლებული ვერსია კი 3 ნოემბერს გამოვა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...