დემირელის სკოლის დაკავებული მენეჯერის, მუსტაფა ემრე ჩაბუქის ადვოკატმა სოსო ბარათაშვილმა, დღეს, 5 ივლისს მთავარ პროკურატურაში განცხადება შეიტანა, ჩაბუქის ოჯახის დაცვის სპეციალურ პროგრამაში ჩართვის მოთხოვნით.

მისი თქმით, ჩაბუქის ცოლისა და არასრულწლოვანი შვილების სიცოცხლეს საფრთხე ემუქრება, ვინაიდან ხელისუფლებასთან დაახლოებული თურქული მედიასაშუალებები და სოციალური ქსელების მომხმარებლები მათ მოღალატეებად მოიხსენიებენ:

"მოთხოვნის საფუძველი იყო თურქეთის სოციალურ ქსელებში და მედიაში გავრცელებული მუქარის შემცველი ინფორმაცია, რომლითაც მოთხოვნილია ამ ადამიანების სიკვდილით დასჯა, ისინი გამოცხადებულები არიან მოღალატეებად. ამ ყველაფერს ითხოვენ სოციალური ქსელის მომხმარებლები".

მუსტაფა ემრე ჩაბუქს თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. მოსამართლემ პროკურატურის შუამდგომლობა დააკმაყოფილა. ხელისუფლებას ჩაბუქის გათავისუფლებისკენ და თურქეთისთვის არგადაცემისკენ მოუწოდა რვა არასამთავრობო ორგანიზაციამ.