კომპანია ფაზი, რომელიც თიბისის მხარდაჭერით მესამე წელია მომხმარებელს ფაზლების, სამაგიდო თამაშებისა და ლეგო / კონსტრუქტორების დიდ არჩევანს სთავაზობს, უკვე ბათუმი მოლში, სტენდის სახითაა წარმოდგენილი.

ფაზის დამფუძნებელი, გიორგი ბახუტაშვილი ამბობს, რომ თავდაპირველად ჰქონდათ იდეა, რომ სურათებისგან ფაზლები შეექმნათ და ასე დაიწყო ფიქრი ფაზის განვითარებაზე, გეგმები მცირედით შეეცვალათ, თუმცა იდეის განვითარება მაინც დაიწყეს.

"ბრენდის განვითარება დასაწყისში ძალიან გაგვიჭირდა, რადგან დიდ ფინანსებთან იყო კავშირში. ცოტა ხნით გადავდეთ და ფაზლებისა და სამაგიდო თამაშების ონლაინ მაღაზია შევქმენით, რომელიც 500-მდე დასახელების ფაზლსა თუ სამაგიდო თამაშს აერთიანებს. ჩვენი ყოველდღიურობა სოციალური ქსელებითაა მოცული, სამაგიდო თამაშები კი იდეალური გზაა მეგობრებთან ერთად გართობის, ახალი სამყაროს შეცნობისა და დამღლელი დღის შემდეგ განტვირთვისთვის. ჩვენი კონცეფციაც სწორედ გონების ვარჯიში და სტრესის მოხსნის თამაშით გადაწყვეტაა", — აღნიშნავს გიორგი.

ცარიელი ფურცლიდან დაწყებული ბიზნესის განვითარებისთვის დამატებითი ინვესტიციის მოზიდვა სჭირდებოდათ და 2021 წელს თიბისი სტარტაპერს მიმართეს, სწორედ მათი მხარდაჭერით შეძლეს წინსვლა.

"სტარტაპერის მხარდაჭერით, გავამრავალფეროვნეთ პროდუქცია და შევქმენით კომპანიის ვებგვერდი — puzz.ge, რომელზეც მომხმარებელს შეუძლია დაათვალიეროს, აირჩიოს და გამოიწეროს მისთვის სასურველი პროდუქტი. სწრაფი მიტანის სერვისის მეშვეობით მომხმარებელი გამოწერილ პროდუქტს თბილისში იმავე ან მომდევნო დღეს იღებს, ხოლო რეგიონებში 2-3 სამუშაო დღეში", — ამბობს გიორგი.

გარდა ამისა, 4 თვეა, რაც თიბისის მხარდაჭერით, ბათუმი მოლში სტენდ-მაღაზია გახსნეს და გიორგის თქმით, იმედი აქვთ, რომ ფაზი ბათუმშიც პოპულარული გახდება, ამასთან წლის ბოლომდე თბილისის ერთ-ერთ ჰიპერმარკეტში გეგმავენ სტენდ-მაღაზიის გახსნას.

"ფაზისთვის განსაკუთრებით მნიშვნელოვანია გონების გასავარჯიშებელი თამაშების რეალიზაცია, ამიტომ აქტიურად ვთანამშრომლობთ სკოლებთან და სხვადასხვა კერძო თუ სახელმწიფო ორგანიზაციებთან, რომლებსაც ვთავაზობთ ინტელექტუალურ სამაგიდო თამაშებს. ასეთი თანამშრობლობა მოტივაციას გვაძლევს, ეს მიმართულება კიდევ უფრო დავხვეწოთ.

ჩვენი გუნდი ორიენტირებულია ხარისხსა და მომხმარებლის მოთხოვნაზე, ამიტომ ვცდილობთ, შევთავაზოთ მათ მსოფლიოში ცნობილი ისეთი სამაგიდო თამაშები, როგორიცაა კატანი, დიქსითი, ავალონი, ცნობილი მხატვრების ვან გოგისა, და ფრიდა კალოს ნახატების ფაზლები, სტადიონებისა 3D მაკეტები და ლეგოს ბრენდის კონსტრუქტორები", — აღნიშნავს გიორგი.

ფაზი სხვადასხვა ასაკობრივ კატეგორიას განსხვავებულ არჩევანს სთავაზობს — დაწყებული ორდეტალიანი ფაზლით, რომელსაც ორი წლის ბავშვიც გაუმკლავდება, დამთავრებული კომპლექსური სამაგიდო თამაშებით, რომლებიც ხშირად იზიდავენ ზრდასრულებს.

"ოქტომბრიდან უკვე შევძლებთ მომხმარებლის გამოგზავნილი ფოტოების ფაზლად ქცევას, რაც ძალიან გვახარებს, რადგან სწორედ ამ იდეით შევქმენით ბრენდი და ცოტა დაგვიანებით, მაგრამ 3 წლის შემდეგ მაინც შევძელით მისი განხორციელება", — ამბობს გიორგი.

ნოემბერში ფაზი 3 წლის ხდება და წინ დიდი გეგმები და განვითარების გზები აქვთ, თიბისისთან ურთიერთობის გაგრძელებას სამომავლოდაც აპირებენ, რადგან როგორც გიორგი ამბობს, სტარტაპი თიბისისთან ერთად დაიწყეს და მათი ყველა სიახლე სწორედ თიბისის უკავშირდება.

"ადამიანებს, რომლებიც ახლა იწყებენ თავიანთი იდეების განხორციელებას, ვურჩევდი, იდეის დაბადების შემდეგ მალევე იმოქმედონ მათი სისრულეში მოყვანისთვის. ჩვენი გამოცდილება აჩვენებს, რომ თანმიმდევრული, შრომითა და განვითარების უწყვეტი სურვილით ყველაზე რთული იდეების ხორცშესხმაც შესაძლებელია", — აღნიშნავს გიორგი.