ლეგო ახალ ბრაილის შრიფტიან კუბებს გაყიდის, რომლებიც მხედველობადაქვეითებულ და უსინათლო ბავშვებს ბრაილით კითხვის სწავლაში დაეხმარება. ლეგოს კუბები, რომლებზეც ბრაილის შრიფტით ანბანი და რიცხვები იქნება დატანილი, სექტემბრიდან გაიყიდება.

დანიელი სათამაშოების მწარმოებელი კომპანია უსინათლოთა ორგანიზაციებთან თანამშრომლობით სკოლებსა და სხვადასხვა საგანმანათლებლო დაწესებულებებს მსგავს კუბებს 2020 წლიდან უსასყიდლოდ აწვდის, ახლა კი მათ კუბების გაყიდვა გადაწყვიტეს, რათა ნებისმიერ ბავშვს სახლშიც შეეძლოს მათი გამოყენება.

კუბებზე დაბეჭდილი განმარტებებიც იქნება დატანილი, რაც ბავშვის ოჯახის წევრებს ბრაილის შრიფტის სწავლაში დაეხმარება. ლეგოს წარმომადგენლების თქმით, უნდათ, რომ ბრაილის სწავლა ბავშვებისა და მათი ოჯახის წევრებისთვის უფრო სახალისო და საინტერესო გახდეს, სწორედ ამისთვის კომპლექტს საგანმანათლებლო თამაშების იდეებიც მოყვება.

მიუხედავად იმისა, რომ თანამედროვე ტექნოლოგიების ფონზე საზოგადოების ნაწილის ბრაილის შრიფტს ძველმოდურად მიიჩნევს, უსინათლოებისა და მხედველობადაქვეითებული ადამიანების თქმით, მისი გამოყენება მათ ერთგვარ თავისუფლებას ანიჭებთ.

ევროპის უსინათლოთა კავშირი (EBU) ამბობს, რომ ბრაილის ცოდნა მართლწერის, კითხვისა და წერის უნარებს აუმჯობესებს, რაც მხედველობადაქვეითებული ადამიანების განათლების მაღალ დონესა და უკეთესი დასაქმების შესაძლებლობებს უწყობს ხელს.

დეივ უილიამსის, უსინათლოთა სამეფო ეროვნული ინსტიტუტის ინკლუზიური დიზაინის ელჩის თქმით, ლეგო ბრაილის შესწავლის პროცესს ნაკლებად მოსაწყენს და უფრო სწრაფს ხდის.

"ვის ენდომება, რომ პირადი მისალოცი ბარათები ხმამაღლა წაუკითხონ? ასევე არსებობს სამაგიდო თამაშები, ეტიკეტები და თქვენი შვილებისთვის ძილის წინ ზღაპრების წაკითხვის შესაძლებლობა — ეს ყველაფერი რთულია გააკეთო კომპიუტერით, რომელიც ყურში გელაპარაკება", — თქვა დეივმა.

7 წლის ოლივიას დედა, ტეილორი, მსგავსი ლეგოს მნიშვნელობაზე საუბრობს.

"ოლივიამ ლეგოს ბრაილის კუბები სკოლაში აღმოაჩინა და მათ დიდი გავლენა მოახდინეს ბრაილის შრიფტის მიმართ მის ცნობისმოყვარეობაზე. მანამდე სიმბოლოების გაგება უჭირდა, მაგრამ ახლა სულ უფრო მეტს სწავლობს", — ამბობს ის.

ტეილორმა ისიც დაამატა, რომ ლეგოს საშუალებით ბრაილის შრიფტს მთელი ოჯახი — თვითონ, მისი ქმარი, ოლივიას ბებია და მისი ოთხი წლის ქალიშვილი, იმოგენიც, სწავლობენ. ოჯახის თქმით, ლეგოს მეშვეობით ოლივიას საშინაო დავალების მომზადებაშიც უფრო მარტივად ეხმარებიან.

პირველ ეტაპზე, ბრაილის ლეგოს შეძენა ექვს ინგლისურენოვან და ხუთ ფრანგულენოვან ქვეყანაში იქნება შესაძლებელი. იტალიური, გერმანული და ესპანური ვერსიები კი, მომავალ წელს გამოვა. ლეგოს თქმით, ამ ნაბიჯით უნდათ, მათი თამაშები უფრო მეტად ინკლუზიური გახდეს.