იტალიელი მომღერალი ტოტო კუტუნიო 80 წლის ასაკში გარდაიცვალა. ამის შესახებ ინფორმაცია მუსიკოსის მენეჯერმა გაავრცელა და დასძინა, რომ ხანგრძლივი ავადმყოფობის შემდეგ ტოტო კუტუნიო მილანის ერთ-ერთ საავადმყოფოში გარდაიცვალა.

ჯერჯერობით მომღერლის გარდაცვალების ზუსტი მიზეზი არ სახელდება, თუმცა მისი მენეჯერის თქმით, ჯანმრთელობის პრობლემების გამო ბოლო თვეებში ტოტო კუტუნიოს მდგომარეობა უარესდებოდა.

ტოტო კუტუნიომ მუსიკალური კარიერა 1966 წელს დაიწყო და რამდენიმე კონკურსში გაიმარჯვა. ცოტა ხნის შემდეგ მისი სიმღერებიც პოპულარული გახდა, განსაკუთრებით კი L'Italiano, რომელიც მსოფლიოს ჰიტად გამოსვლიდან მალევე იქცა.

2007 წელს ტოტო კუტუნიოს პროსტატის კიბოს დიაგნოზი დაუსვეს, თუმცა ის მალევე გამოჯანმრთელდა და სცენასაც დაუბრუნდა. ბოლო პერიოდის განმავლობაში კი, ტოტო კუტუნიო საზოგადოებრივ ცხოვრებას ჩამოშორებული იყო. შეგახსენებთ, რომ მომღერალი საქართველოს 2007 და 2012 წლებში ეწვია.