ევროპული საქართველოს წვერი ირაკლი აბესაძე თბილისის მერობის კანდიდატებთან დაკავშირებით აცხადებს, რომ დავით ნარმანიას მერობის დროს "შექმნილი პრობლემებიდან" გამოსვლა მხოლოდ ელენე ხოშტარიას შეუძლია, რადგან თბილისის პრობლემების მოგვარების გეგმა ჯერ მხოლოდ მისმა პარტიამ წარადგინა.

"ქართული ოცნების და ნარმანიას მმართველობამ ძალიან ბევრი პრობლემა შექმნა და დააგროვა თბილისში და ამ პრობლემებიდან გამოსავლის ერთადერთი კომპლექსური გეგმა ჯერჯერობით წარმოადგინა მხოლოდ და მხოლოდ ევროპულმა საქართველომ და ელენე ხოშტარიამ".

აბესაძე აცხადებს, რომ ელენე ხოშტარიასთვის კონკურენციის გაწევას მხოლოდ ქართული ოცნების მიერ დასახელებული კანდიდატი, კახა კალაძე, შეძლებს:

"ერთადერთ კონკურენტუნარიანად შეიძლება წარმოვიდგინოთ სახელისუფლებო კანდიდატი, მხოლოდ და მხოლოდ იმიტომ რომ სამწუხაროდ მას ექნება შეუზღუდავი შესაძლებლობა ადმინისტრაციული რესურსებით და სახელმწიფო ბიუჯეტით სარგებლობის და ასე უკანონოდ ეცდება დაამარცხოს კონკურენტი".

გუშინ, პრემიერმინისტრმა გიორგი კვირიკაშვილმა ქართული ოცნების თბილისის მერობის კანდიდატი კახა კალაძე ოფიციალურად წარადგინა. კალაძეს თბილისელებისთვის არაპოპულარულად აფასებს ნაციონალური მოძრაობის მერობის კანდიდატი ზაალ უდუმაშვილი.

თავის მხრივ, ელენე ხოშტარია მერად არჩევის შემთხვევაში თბილისელებს პენსიის მომატებას პირდება.