რატომ არის მნიშვნელოვანი: საგანგებო სიტუაციების მართვის სამსახური მოქალაქეებს მიმდინარე კვირაში ტემპერატურის მოსალოდნელი მატებასა და ტყის ხანძრების რისკის გაზრდაზე აფრთხილებს.

  • უწყება მოუწოდებს მოქალაქეებს ხანძრის კერისა ან დაკვამლიანების შემთხვევაში დაუყოვნებლივ დარეკონ 112-ში.
  • გარდა ამისა, აქვეყნებს რეკომენდაციებს, რომლითაც ტყის ხანძრების თავიდან არიდება იქნება შესაძლებელი.

რეკომენდაციები: ნუ დაწვავთ ნარჩენებს, მცენარეებს ან სხვა მასალებს ტყეში, ნუ გადაადგებთ ანთებულ სიგარეტს ტყეში, ნუ დაანთებთ ცეცხლს ტყეში გამხმარი მცენარებით მოფენილ ნიადაგდე.

  • თვითაალების საშიშროებიდან გამომდინარე, მოერიდეთ ტყეში ან მის სიახლოვეს ნარჩენების დაყრას, ყურადღება მიაქციეთ ტყის მიმდებარედ ამკრძალავ ნიშნებს, დაიცავით ტყეში ქცევის წესები, გაუფრთხილდით გარემოს.
  • ნუ დაანთებთ კოცონს ტყეში გამხმარი ბალახისა და ტოტების სიალხლოვეს, კოცონის ან ღია ცეცხლის ჩაქრობისას დარწმნუნდით, რომ არ დარჩა გაღვივებული ნაკვერჩხალი.
  • საგულდაგულოდ დაამუშავეთ ცეცხლის კერა წყლის ან ბარის პირით ნიადაგის ფენების გადაბრუნებით.

რაც შეეხება ამინდს, გარემოს ეროვნული სააგენტოს ცნობით, აღმოსავლეთ საქართველოში ჰაერის ტემპერატურა, სავარაუდოდ, 41 გრადუსს მიაღწევს, დასავლეთში — 39-ს.

  • ასევე, ვარაუდობენ, რომ მაღალმთაში ტემპერატურა +28, +33 გრადუსამდე მოიმატებს.
  • აღნიშნავენ, რომ მოსალოდნელი მაღალი ტემპერატურები სითბური სტრესის, ტყის ხანძრებისა და მყინვარების დნობასთან დაკავშირებული პროცესების გააქტიურების ხელმშემწყობი პირობებია.