რატომ არის მნიშვნელოვანი: ანტივაქსერობით ცნობილმა რუსეთში მცხოვრებმა მომღერალმა დეველოპერული კომპანია დააარსა, რომელიც ბათუმში გამოფენას გეგმავს.

  • კომპანიის ვებგვერდი, ისევე, როგორც ირაკლი ფირცხალავას ფეუსბუქგვერდი, რომლითაც ის ხალხს ღონისძიებაში მონაწილეობისკენ მოუწოდებს და მას არეკლამებს, მხოლოდ რუსულ ენაზეა.
  • "საიმედო მშენებლები, ექსკლუზიური უძრავი ქონება, დიდი ფასდაკლებები შეძენაზე და პრიზების გათამაშება", — ამბობს ის ვიდეოში და ღონისძიების დახურვას მისი კონცერტით აანონსებს.

დეტალები: საიტზე ღონისძიების შესახებ მოკლე ინფორმაცია დევს, სადაც ნათქვამია, რომ საქართველო უცხოეთის მოქალაქეებს უძრავი ქონების შეძენისთვის უამრავ შესაძლებლობას სთავაზობს.

  • ასევე, ვკითხულობთ, რომ გამოფენაზე მისულებს შესაძლებლობა ექნებათ, პირადად გაესაუბრონ კომპანიის ორგანიზატორებს.
  • "დარწმუნდებით, რომ ბათუმში თქვენი მოთხოვნების შესაბამისი სრულყოფილი ქონების პოვნა შესაძლებელია", — წერია ვებგვერდზე.
  • გამოფენა 29-30 ივლისს არის დაგეგმილი და ნათქვამია, რომ იქ მხოლოდ "ყველაზე სანდო დეველოპერები" იქნებიან წარმოდგენილი.
  • საიტი ახლა აღარ იძებნება.

ქართული კომპანიები გამოფებაზე: People Real-Estate-ის ვებგვერდზე თავდაპირველად გამოქვეყნებული იყო იმ ქართული სამშენებლო კომპანიების სია, რომლებიც ღონისძიებაში იღებდნენ მონაწილეობას.

  • ცოტა ხნის შემდეგ, რამდენიმე მათგანმა ინფორმაცია უარყო.
  • გუბმათი ჯგუფის განცხადებით, People Real-Estate-მა მათ გამოფენა-გაყიდვაში მონაწილეობა შესთავაზა, თუმცა მაშინვე უარი განაცხადეს და წერენ, რომ მათი ლოგო უნებართვოდ იქნა გამოყენებული.
  • ბათუმელებთან გამოფენაში მონაწილეობა უარყო არქი ჯგუფმაც, ხოლო ელბილდინგმა განაცხადა, რომ ინფორმაციას არ ფლობენ და გადაამოწმებენ.
  • On.ge-იმის გასარკვევად, გაიცა თუ არა ღონისძიების ჩატარების ნებართვა, მერიას დაუკავშირდა, პასუხს მიღებისთანავე შემოგთავაზებთ.