როგორც ჩანს, ბარბენჰაიმერი შეიძლება მართლაც იქცეს რეალობად — კრისტოფერ ნოლანის ოპენჰაიმერის ვარსკვლავი, კილიან მერფი, არ გამორიცხავს, რომ გრეტა გერვიგის ბარბის მეორე ნაწილში კენი განასახიეროს.

"ვითამაშებდი თუ არა კენის როლს ბარბის მეორე ნაწილში? რა თქმა უნდა", — ამბობს ირლანდიელი მსახიობი, — "მოდი, ჯერ სცენარს წავიკითხავ და მერე განვიხილოთ".

მერფიმ ისიც აღნიშნა, რომ "ერთი სული აქვს", როდის ნახავს გერვიგის ბარბის.

"მოუთმენლად ველოდები", — აცხადებს მსახიობი, — "ამ ზაფხულს ამდენი შესანიშნავი ფილმის პრემიერა კინოსამყაროსთვის დიდი მოვლენაა.

"მაყურებლისთვისაც კარგი ამბავია, რომ ორი არაჩვეულებრივი რეჟისორის ნამუშევარი ერთ დღეს გამოდის. შეგიძლია მთელი დღე კინოთეატრში გაატარო. ამაზე უკეთესი რა უნდა იყოს?"

რაც შეეხება ბარბენჰაიმერს — ეს ტერმინი ინტერნეტში სულ ახლახან გაჩნდა წლის ორი მთავარი კინოპრემიერის თარიღის დამთხვევის აღსანიშნად. საქმე ისაა, რომ ორი სრულიად განსხვავებული ფილმი — გრეტა გერვიგის ბარბი და კრისტოფერ ნოლანის ოპენჰაიმერი — ერთსა და იმავე დღეს, 20 ივლისს გამოვიდა. ამის გამო ინტერნეტმომხმარებლები ჯერ იმას განიხილავდნენ, ვინ რომელი ფილმის პრემიერაზე მიდიოდა, მერე კი ამ დილემაზე ხუმრობდნენ კიდეც.

საბოლოო ჯამში, როგორც მოსალოდნელი იყო, ორივე ფილმის პრემიერას აღფრთოვანებული გამოხმაურება მოჰყვა. აი, გრეტა გერვიგმა კი არაერთი რეკორდიც მოხსნა, რადგან ბარბის ქალი რეჟისორების აქამდე გამოსულ ფილმებს შორის კომერციულად ყველაზე წარმატებული პრემიერა ჰქონდა.

თუმცა, ჯერ კიდევ ფილმის გამოსვლამდე, ბარბის როლის შემსრულებელმა მარგო რობიმ მიგვანიშნა, რომ მეორე ნაწილს შეიძლება ველოდოთ.

"ახლა სიუჟეტი უამრავი სხვადასხვა გზით შეიძლება განვითარდეს", — დაამატა მაშინ მსახიობმა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...