რა ხდება: ევროპარლამენტის ლგბტქ+ უფლებებზე მომუშავე ჯგუფი, LGBTI Intergroup, პრორუსული, ძალადობრივი და ჰომოფობიური ალტ-ინფოსა და კონსერვატიული მოძრაობის დამფუძნებლის, კონსტანტინე მორგოშიას სანქცირების მოწოდებით გამოდის.

• ჯგუფის თანათავმჯდომარეები და ვიცეპრეზიდენტები წერილით მიმართავენ ევროკომისიის პრეზიდენტს, ურსულა ფონ დერ ლაიენს, ევროსაბჭოს პრეზიდენტს, შარლ მიშელს, საქართველოში ევროკავშირის ელჩს, პაველ ჰერჩინსკისა და თანასწორობის საკითხებში ევროკომისარს, ჰელენა დალის.
• წერილში ევროპარლამენტარები გმობენ 8 ივლისს განვითარებულ მოვლენებს და ხაზს უსვამენ, რომ დაირღვა ლგბტქ+ ადამიანების შეკრებისა და გამოხატვის თავისუფლება.

• "თუ ჰომოფობიური აგრესიის ეს საზარელი აქტი ხელისუფლების მხრიდან საფუძვლიანად გამოძიებული და შესაბამისი ქართველი აქტორების მიერ მტკიცედ დაგმობილი არ იქნება, ეს საქართველოს პროგრესს ამ მიმართულებით სერიოზულად შეაფერხებს. [...] მტკიცედ მოგიწოდებთ, მიიღოთ ალტ-ინფოს ჯგუფზე და მის უკან მდგომ ოლიგარქზე, კონსტანტინე მორგოშიაზე მიმართული სანქციები", — ნათქვამია წერილში.

რატომ არის მნიშვნელოვანი: 8 ივლისს დახურულ ტერიტორიაზე დაგეგმილი, მშვიდობიანი პრაიდფესტივალი ჩაიშალა.

• ღიად პრორუსულმა, ძალადობრივმა ალტ-ინფომ და სასულიერო პირებმა ვაჟა ფშაველას ძეგლთან ჰომოფობები შეკრიბეს და ღონისძიების ჩასაშლელად მსვლელობა დაიწყეს.
• მიუხედავად იმისა, რომ ფესტივალი დახურულ სივრცეში ტარდებოდა, შინაგან საქმეთა სამინისტროს კი უსაფრთხოების დაცვის პირობა საჯაროდ ჰქონდა დადებული, მოძალადეები საფესტივალო ტერიტორიამდე უპრობლემოდ ავიდნენ, ამის შემდეგ კი ფესტივალის ორგანიზატორებისა და იქ მყოფი პირების ევაკუაცია გახდა საჭირო.
• მოძალადე ჯგუფები ლისი ვანდერლენდის ტერიტორიაზე შეიჭრნენ — დაწვეს, დაამტვირეს და გატეხეს ფესტივალის ინვენტარი, მოიპარეს გამაგრილებელი, ასევე, ალკოჰოლური სასმელები და სხვა ნივთები.
• სამართალდამცველებმა ძალადობრივი ჯგუფის ერთ-ერთი ლიდერი, ზურა მახარაძე ფესტივალის ტერიტორიაზე შეაცილეს, რათა დარწმუნებულიყო, რომ ფესტივალის ორგანიზატორებმა და მონაწილეებმა იქაურობა დატოვეს.

პრაიდის ორგანიზატორების განცხადებით, 8 ივლისს განვითარებული მოვლენები მიანიშნებს, რომ თავდასხმა წინასწარ კოორდინირებული და შეთანხმებული იყო შინაგან საქმეთა სამინისტროსა და ძალადობრივ დაჯგუფება ალტ-ინფოს შორის.

• შსს კი თავს იმართლებს და უსაფრთხოების დაუცველობას გაშლილ ტერიტორიასა და ხალხის რაოდენობას აბრალებს.
• თუმცა, ჟურნალისტების კითხვას, რატომ არ გადაკეტეს გზები და არ მიიღეს შესაბამისი პრევენციული ზომები, მინისტრის მოადგილემ არ უპასუხა.