რა მოხდა 8 ივლისს: დახურულ ტერიტორიაზე გამართული პრაიდფესტივალი ჩაიშალა.

  • ღიად პრორუსულმა ძალადობრივმა ალტინფომ და სასულიერო პირებმა ვაჟა ფშაველას ძეგლთან ჰომოფობები შეკრიბეს და პრაიდფესტივალის ჩასაშლელად მსვლელობა დაიწყეს.
  • მიუხედავად, იმისა, რომ ღონისძიება დახურულ სივრცეში ტარდებოდა, შინაგან საქმეთა სამინისტროს კი უსაფრთხოების დაცვის პირობა საჯაროდ ჰქონდა დადებული, მოძალადეები საფესტივალო ტერიტორიამდე უპრობლემოდ ავიდნენ.
  • ამის შემდეგ კი ფესტივალის ორგანიზატორებისა და იქ მყოფი სხვა პირების ევაკუაცია გახდა საჭირო.
  • მოძალადე ჯგუფები ლისი ვონდერლენდის ტერიტორიაზე შეიჭრნენ — დაწვეს, დაამტვირეს და გატეხეს ფესტივალის ინვენტარი.
  • მოიპარეს გამაგრილებელი, ასევე, ალკოჰოლური სასმელები და სხვა ნივთები, რაზეც არც შემთხვევის ადგილას ჰქონია პოლიციას რამე რეაგირება.
  • მანამდე გავრცელებულ კადრებში ჩანს, რომ სამართალდამცავი ზურა მახარაძეს ფესტივალის ტერიტორიაზე აცილებს, რათა "შეამოწმოს", ნამდვილად დატოვეს თუ არა ღონისძიების მონაწილეებმა სივრცე.

თბილისი პრაიდი წერს, რომ ფესტივალის დარბევის, აქტივისტების ევაკუაციის, კერძო ტერიტორიაზე შემოჭრისა და ქონების განადგურების შემდეგ 10 ივლისს შეტყობინება გააკეთეს სპეციალურ საგამოძიებო სამსახურში.

  • მათ მოითხოვეს ტერიტორიის დათვალიერება, ზიანის შეფასება და გამოძიების დაწყება, მათ შორის, პოლიციელებისა და შსს-ს მიმართ.
  • ორგანიზაციის ცნობით, ძალადობრივი მოვლენებიდან 4 დღის შემდეგაც კი საგამოძიებო სამსახურები მათ ამ დრომდე არ დაკავშირებიან.
  • "არ მოსულან ფესტივალის ტერიტორიაზე და არ ჩაუტარებიათ შესაბამისი სამუშაოები", — აცხადებს თბილისი პრაიდი.
  • ორგანიზაციის ინფორმაციითვე, დეტალურად დაადოკუმენტირეს ზიანი, შეინახეს მისი ამსახველი ფოტო-ვიდეო მასალა, რასაც, საჭიროების შემთხვევაში, შესაბამის ორგანოებს გადასცემენ.
  • On.ge-ს სპეციალურ საგამოძიებო სამსახურში განუცხადეს, რომ ტერიტორიის დათვალიერება, ზიანის შეფასება და გამოძიების დაწყება უწყების ქვემდებარე მუხლებს არ წარმოაგდენს.
  • რაც შეეხება ჟურნალისტური საქმიანობისთვის უკანონო ხელის შეშლას, საგამოძიებოში გვითხრეს, რომ გამოჰკითხეს რუსთავი 2-ის, ფორმულას და მთავარი არხის ჟურნალისტები.