გერმანულენოვანი ქართველი მწერლის, ნინო ხარატიშვილის, მსოფლიო ბესტსელერად ქცეულ რომანს მერვე სიცოცხლე (ბრილკას) გერმანიაში სერიალად გადაიღებენ. პროექტის პროდიუსერები ოთხგზის ოსკაროსანი ფილმის All Quiet on the Western Front შემქმნელები არიან. მათთან ერთად, გამოცემა The Hollywood Reporter-ის ცნობით, ხარატიშვილის რომანის ეკრანიზაციაზე ემის მფლობელი სტუდია The Ink Factory იმუშავებს. პროექტის ხელმძღვანელი კი არაერთი წარმატებული ფილმისა და სერიალის შემქმნელი, სარა ლამბერტი, იქნება.

"მერვე სიცოცხლე თამამი, ემოციური და თვითმყოფადი ლიტერატურის ნიმუშია, რომელიც წარსულსა და აწმყოში მცხოვრები ქალების ხმას მკაფიოდ გვაგონებს", — აცხადებენ ოსკაროსან კომპანია Amusement Park-ში, — "ეს რომანი სერიალად ქცევისთვისაა გაჩენილი. ძალიან გვიხარია, რომ ამ გრანდიოზული პროექტის ნაწილი გავხდით და საშუალება მოგვეცა, ჩვენს დიდი ხნის პარტნიორებთან, The Ink Factory-სთან და სარა ლამბერტთან ვითანამშრომლოთ".

ფოტო: Steffen Baraniak

2014 წელს გამოცემული მასშტაბური რომანი, მერვე სიცოცხლე (ბრილკას), ბევრ ქვეყანაში, მათ შორის, საქართველოში, ბესტსელერად იქცა. ნინო ხარატიშვილი კი "ტოლსტოის მემკვიდრედაც" მოუხსენიებიათ. მწერლის წიგნები მსოფლიოში მილიონზე მეტ ეგზემპლარადაა გაყიდული. მერვე სიცოცხლით ავტორი გახდა ბუკერის საერთაშორისო პრემიისა და დუბლინის ლიტერატურული პრემიის ნომინანტიც. ხარატიშვილს გერმანიაში ასევე მიღებული აქვს კარლ ცუკმაიერის მედალი და გიზელა ელსნერის პრემია.

წინა წლის მიწურულს ქართულად ითარგმნა მწერლის ამ დროისთვის ბოლო რომანი უკმარი სინათლე. აღნიშნული წიგნი შარშანდელ ბერლინალეზე იმ 10 საუკეთესო რომანს შორის დაასახელეს, რომელთა ეკრანიზაციასაც კინოხელოვანებს ურჩევენ. ჯერ კიდევ ორიგინალურ ენაზე გამოცემამდე უკმარი სინათლის თარგმნის უფლება 10-ზე მეტ ქვეყანაში გაიყიდა, მათ შორის, მსოფლიოს ერთ-ერთ უდიდეს გამომცემელ HarperCollins-ზე. აღსანიშნავია ისიც, რომ ქართულ ენაზე წიგნის გამოცემიდან მესამე დღეს ტირაჟი ამოიწურა.