ცნობილმა გერმანულენოვანმა ქართველმა მწერალმა და თეატრის რეჟისორმა, ნინო ხარატიშვილმა, გერმანიაში კიდევ ერთი ლიტერატურული ჯილდო მიიღო. ავტორი ამჯერად გიზელა ელსნერის ლიტერატურული პრემიის მფლობელი გახდა.

პრიზი ნიურნბერგის ლიტერატურულმა სახლმა წელს უკვე მეორედ გასცა. პრემია 10 ათას ევროს შეადგენს. ჟიურის თქმით, ხარატიშვილის შემოქმედება დღევანდელ მსოფლიოში განსაკუთრებით აქტუალურია.

"ავტორი ახერხებს, არა მხოლოდ საქართველოს წარსული წარმოაჩინოს ევროპის ისტორიის ნაწილად, არამედ ქართული ლიტერატურისა და კულტურის ევროპული ხასიათიც ასახოს თავის შემოქმედებაში", — ნათქვამია ჟიურის განცხადებაში, — "ეს არის ცალკეული პიროვნებების ხვედრისა და ისტორიული სინამდვილის შერწყმა, რაც, უკრაინაში მიმდინარე სამხედრო აგრესიის ფონზე, ხარატიშვილის ტექსტებს სხვა ნებისმიერ ლიტერატურულ ხმაზე მეტ აქტუალურობას სძენს".

ფოტო: Georgia Made by Characters

აღსანიშნავია, რომ რამდენიმე თვის წინ ნინო ხარატიშვილს გერმანიაში კარლ ცუკმაიერის მედალიც გადაეცა "გერმანული ენისა და მხატვრული სიტყვის" წინაშე დამსახურებისთვის. მაშინ ხარატიშვილი "ერთ-ერთ უდიდეს გერმანულენოვან მთხრობლად" მოიხსენიეს და აღნიშნეს, რომ "უკრაინის წინააღმდეგ რუსეთის სამხედრო აგრესიის ფონზე, მისი რომანები შემაშფოთებლად რელევანტურია".

არაერთი ბესტსელერის ავტორი, ნინო ხარატიშვილი, ბუკერის საერთაშორისო პრემიისა და დუბლინის ლიტერატურული პრემიის ნომინანტიცაა. 2014 წელს გამოცემული მისი მასშტაბური რომანი, მერვე სიცოცხლე, ბევრ ქვეყანაში, მათ შორის საქართველოში, ბესტსელერად იქცა. ხარატიშვილი "ტოლსტოის მემკვიდრედაც" მოუხსენიებიათ. მისი წიგნები მსოფლიოში მილიონზე მეტ ეგზემპლარადაა გაყიდული.

წინა წლის მიწურულს ქართულად ითარგმნა მწერლის ამ დროისთვის ბოლო რომანი უკმარი სინათლე. აღნიშნული წიგნი გასულ წლის ბერლინალეზე იმ 10 საუკეთესო რომანს შორის დაასახელეს, რომელთა ეკრანიზაციასაც კინოხელოვანებს ურჩევენ. ჯერ კიდევ ორიგინალურ ენაზე გამოცემამდე ხარატიშვილის ამ ნაწარმოების თარგმნის უფლება 10-ზე მეტ ქვეყანაში გაიყიდა, მათ შორის, მსოფლიოს ერთ-ერთ უდიდეს გამომცემელ HarperCollins-ზე. აღსანიშნავია ისიც, რომ ქართულ ენაზე წიგნის გამოცემიდან მესამე დღეს ტირაჟი ამოიწურა.

ასევე იხილეთ: