თბილისი პრაიდის პირველი ორი ღონისძიება — კვირეულის გახსნა და საერთაშორისო კონფერენცია უკვე გაიმართა.

  • "სიყვარულს ვერ დაამარცხებ" — წლევანდელი კვირეულის მთავარი სათქმელია, რაც არაერთხელ მოვისმინეთ ორივე ღონისძიების მსვლელობისას.
  • ამ სიტყვებს ბევრჯერ გავიგებთ ხვალ, 8 ივლისსაც პრაიდ ფესტივალზე, რომლითაც კვირეული დაიხურება.

რა გელოდება ფესტივალზე: იქ მისულ სტუმრებს უამრავი საინტერესო კუთხე, ვორქშოფები სხვადასხვა საკითხზე, გამოფენები და არაერთი აქტივობა დაგხვდებათ.

  • გარდა ამისა, ფესტივალზე იმღერებს არაერთი მუსიკალური ჯგუფი, მათ შორის, Bedford Falls, 4D Monster Lobsters და სხვა.
  • "ამოისუნთქე და დაისვენე უთანასწორო და უსამართლო გარემოსგან! ერთად გავატაროთ ფერადი, ბრჭყვიალა და დაუვიწყარი დრო", — ვკითხულობთ ღონისძიების აღწერაში.

ორგანიზატორებმა განცხადება გაავრცელეს, სადაც ძალადობრივი ჯგუფების იმ დეზინფორმაციას პასუხობენ, თითქოს ხვალ არა დახურული ღონისძიება, არამედ ღირსების მარშია დაგეგმილი.

  • აღნიშნავენ, რომ რადიკალურ ჯგუფებს საზოგადოება განზრახ შეყავთ შეცდომაში, რათა გარკვეულ სეგმენტში სიძულვილი გააღვივონ.
  • "კიდევ ერთხელ გვინდა ხაზი გავუსვათ ფაქტს, რომ არ ტარდება არავითარი ქუჩის მსვლელობა, ხოლო ფესტივალი კერძო, დახურულ ტერიტორიაზე, დარეგისტრირებული სტუმრებისთვის იმართება. მას აქვს საგანმანათლებლო, კულტურული და სოციალური ხასიათი".
  • ორგანიზატორების განცხადებით, უკვე თვეებია, საერთაშორისო პარტნიორების ჩართულობით, მოლაპარაკებებს აწარმოებენ შსს-სთან.
  • "გვაქვს მყარი გარანტიები, რომ ფესტივალი იქნება დაცული", — წერენ ისინი.
  • თბილისი პრაიდი წერს, რომ ფესტივალზე როგორც ქვიარ თემის წევრებს, ისე მხარდამჭერებს, დიპლომატიურ კორპუსსა და საერთაშორისო პარტნიორებს ელიან.
  • უსაფრთხოებიდან გამომდინარე კი ტერიტორიაზე მხოლოდ სრულწლოვნები დაიშვებიან.
  • "მოვუწოდებთ ყველა თანამოქალაქეს, დაგმოს რადიკალური ჯგუფების ძალადობრივი მუქარები პრაიდის ფესტივალის მიმართ. ნუ გახდებით დეზინფორმაციის მსხვერპლი და გამავრცელებელი. დადექით დემოკრატიის, ადამიანის უფლებებისა და სიყვარულის მხარეს".

რეკომენდაციები, რომელიც უნდა გაითვალისწინო: კვირეულის ორგანიზატორები, წარსული გამოცდილების გათვალისწინებით, ამბობენ, რომ ფესტივალის დღეს, შესაძლოა, დაძაბული ან სახიფათო სიტუაციები შეიქმნას.

  • თბილისი პრაიდი მოქალაქეებს ურჩევს, ფესტივალის დღეს მოერიდონ ვაჟა-ფშაველას მეტროს მიმდებარე ტერიტორიას, რომელიც ძალადობრივი ჯგუფების მიერ ორგანიზებული შეკრების გამო მაღალი რისკის ზონადაა მონიშნული.
  • ასევე, ორგანიზაციის რეკომენდაციაა, შეძლებისდაგვარად მოერიდოთ მარტო გადაადგილებას და იმგზავროთ ჯგუფურად.
  • მათი რჩევაა, დატენოთ მობილური მოწყობილობები და დარწმუნდეთ, რომ გაქვთ საშუალება, დაუკავშირდეთ სხვებს.
  • ხოლო, თუკი ღონისძიებების მიღმა რაიმე საეჭვოს შეამჩნევთ, თავს დაუცველად ან არაკომფორტულად იგრძნობთ, დაუყოვნებლივ შეატყობინეთ პრაიდის გუნდს, ღონისძიების პერსონალს ან/და დაცვას.