პრაიდის კვირეულის ფარგლებში, 6 ივლისს, თბილისში რიგით მესამე საერთაშორისო ლგბტქ+ კონფერენცია გაიმართა.

• "სიყვარულს ვერ დაამარცხებ" — წლევანდელი კვირეულის მთავარი სათქმელია.
• ორგანიზატორები ამბობენ, რომ სლოგანზე ბევრი იფიქრეს, რადგან არ იცოდნენ, როგორ აღიქვამდნენ მას ადამიანები, თუმცა, როგორც აღმოჩნდა, "სიყვარული მუშაობს".
• კონფერენციის მთავარი თემები ევროპაში ლგბტქ+ ადამიანების უფლებებისა და თანასწორობის მდგომარეობა, ანტიგენდერული მოძრაობები, სტრატეგიული კომუნიკაციები და მდგრადი მოძრაობის მშენებლობა იყო.
• ღონისძიებას 150 მეტი ადამიანი დაესწრო, მათ შორის, დიპლომატიური კორპუსის, სამოქალაქო საზოგადოებისა და საერთაშორისო ორგანიზაციების წევრები, უფლებადამცველები, ექსპერტები და ლგბტქ+ ადამიანები.

პირველი გამომსვლელი ნიდერლანდების ელჩი საქართველოში, მააიკე ვან კოლდამი იყო.

• ელჩმა აღნიშნა, რომ ნიდერლანდების სამეფო ლგბტქ+ ადამიანების გვერდით დგას.
• "მოუთმენლად ველოდები, რომ დავესწრო პრაიდის ფესტივალს. ეს არის დღესასწაული. ეს არ არის უმრავლესობაზე ან უმცირესობაზე. ეს არის, იყო ის, ვინც ხარ. არ აქვს მნიშვნელობა, რა არის შენი სექსუალური ორიენტაცია, რა გინდა, აკეთო ცხოვრებაში, რამდენად აქტიური გინდა, იყო. ესაა, ისარგებლო შენი კონსტიტუციური უფლებით, სიტყვისა და გამოხატვის თავისუფლებით", — განაცხადა მან.
• ისაუბრა 2021 წლის 5 ივლისის ძალადობაზეც და თქვა, რომ მნიშვნელოვანია, ორგანიზატორები სათანადოდ დაისაჯონ.
• ელჩმა, ასევე, ხაზი გაუსვა, რომ მოწყვლადი ჯგუფების დაცვა 12 პრიორიტეტიდან ერთ-ერთია, რომლის შესრულებაც საქართველოს ევროკავშირის წევრობის კანდიდატის სტატუსის მისაღებად სჭირდება.

გარდა ამისა, ღონისძიებაზე შეკრებილებს სიტყვით მიმართეს ბრიტანეთის ელჩმა საქართველოში, მარკ კლეიტონმა და გაეროს განვითარების პროგრამის (UNDP-ის) მუდმივმა წარმომადგენელმა საქართველოში, ნიკ ბერესფორდმა.

• კლეიტონის განცხადებით, დიდი ბრიტანეთი გააგრძელებს ლგბტქ+ ადამიანების მხარდაჭერას თანასწორობისთვის ბრძოლაში.
• "ჩემს უმცროს შვილს აქვს მაისური, რომელსაც აწერია, ბედნიერი ვარ, რომ ვარ "მე". ვფიქრობ, ეს არის ის, რისთვისაც ჩვენ უნდა ვიმუშაოთ. ჩვენ გვინდა, შეიქმნას ისეთი გარემო, სადაც კანის ფერისა თუ სექსუალური ორიენტაციისა მიუხედავად, ადამიანები იქნებიან ბედნიერები იმით, ვინც არიან და როგორებიც არიან", — თქვა მან.

UNDP-ის წარმომადგენელმა კი აღნიშნა, რომ პრაიდის კვირეულში მონაწილეობა და მხარდაჭერა ძალიან მნიშვნელოვანია გაერთიანებული ერების ორგანიზაციისთვის, რადგან ეს ადამიანის ფუნდამენტურ უფლებებს ეხება.

• "ანტონიო გუტიერეშის სიტყვები რომ მოვიშველიო, ყველას აქვს უფლება, აირჩიოს და იცხოვროს ისე, როგორც უნდა, ყველას აქვს უფლება, უყვარდეს ის, ვინც მას უნდა და ნებისმიერი მიმართულებით იყოს თავისუფალი საკუთარ არჩევანში", — თქვა მან.
• ბერესფორდმა ყურადღება გაამახვილა გაეროს ადამიანის უფლებათა საყოველთაო დეკლარაციაზე და დასძინა, რომ ის ყველასთვის საერთო უნდა იყოს.
• "უფლებებს ჩვენ ვერ ავირჩევთ. დეკლარაცია არ არის მენიუ, საიდანაც შეგვიძლია, ავირჩიოთ უფლებები, რომლებიც მოგვწონს. ადამიანის უფლებების დაცვა არის ყველასთვის. ამიტომ ჩვენ ვერ ავირჩევთ, რომელი ჯგუფი უფრო იმსახურებს უფლებებს და რომელი ნაკლებად. ადამიანის უფლებები ფუნდამენტურია და თანასწორობა არის ყველასათვის".

ლგბტქ+ კონფერენცია პანელური დისკუსიებითა და ვორქშოპებით გაგრძელდა.

• აქტივისტებმა და უფლებადამცველებმა საქართველოდან, სომხეთიდან, აზერბაიჯანიდან, უნგრეთიდან, უკრაინიდან, ბელორუსიდან, ჩრდილოეთ მაკედონიიდან, გერმანიიდან, ბელგიიდან და დიდი ბრიტანეთიდან ერთმანეთს ცოდნა და თანასწორობისთვის ბრძოლის საკუთარი გამოცდილება გაუზიარეს.
• თბილისი პრაიდის გუნდის წევრები ამბობენ, რომ პრაიდის კვირეული ლესბოსელი, გეი, ბისექსუალი, ტრანსგენდერი და ქვიარ ადამიანებისთვის ერთმანეთის დანახვის, გაერთიანების, თავისუფალი თვითგამოხატვისა და საკუთარი უფლებებისთვის ბრძოლის უნიკალური შესაძლებლობაა.