გასულ წელს გავრცელდა ინფორმაცია, რომ რუსული ხელოვნური თანამგზავრი „მაიაკი“ ერთ-ერთი ყველაზე კაშკაშა ვარსკვლავი გახდებოდა ღამის ცაზე. ახლა კი, მის გაშვებამდე სულ რაღაც ორი კვირა რჩება.

პატარა თანამგზავრი CubeSat-ის ტიპისაა, დაახლოებით პურის ნაჭრის ზომა. მას პარასკევს, 14 ივლისს, ბაიკანურის კოსმოდრომიდან (ყაზახეთი), ორბიტაზე „სოიუზი 2.1v“ გაიყვანს. პროექტს მოსკოვის სახელმწიფო მექანიკური ინჟინერიის უნივერსიტეტი ხელმძღვანელობს. მათ საზოგადოებრივი დაფინანსებით ბიუჯეტი $30 ათასამდე გაზარდეს ვებ-საიტ Boomstarter-იდან.

როგორც კი ორბიტაზე გავა, დაახლოებით 600 კილომეტრის სიმაღლეზე, თანამგზავრმა გიგანტური პირამიდის ფორმის მზის რეფლექტორი უნდა გაშალოს. ამ თანამგზავრის მიზანია, ცაზე ყველაზე კაშკაშა ვარსკვლავი იყოს. ამის გასაკეთებლად, რეფლექტორი 16 კვადრატულ მეტრზე გაიშლება და ადამიანის თმაზე 20-ჯერ თხელი იქნება. ამ ყველაფრის მიზანი ტექნოლოგიის დემონსტრაციაც არის რუსების მხრიდან იმის გასატესტად, თუ როგორ შევანელოთ და მოვხსნათ თანამგზავრები ორბიტიდან.

IFLScience ირწმუნება, რომ თავიანთი გამოთვლებით, მისი ვარსკვლავიერი სიდიდე (სიკაშკაშის საზომი ერთეული) -3,6 იქნება, რის შედეგადაც ის მეოთხე ყველაზე კაშკაშა ობიექტი იქნება ცაზე მზის, მთვარისა და ვენერას შემდეგ. სხვა გამოთვლებით, მისი ვარსკვლავიერი სიდიდე -10-ს გაუტოლდება, რაც ვენერაზე კაშკაშაა.

მართალია, საინტერესო პროექტი ჩანს, თუმცა ნამდვილად არ არის სასარგებლო. მრავალი ასტრონომიული პროგრამა დამოკიდებულია მთლიანი ღამის ცის ხილვადობაზე და როდესაც ცაზე ძალიან კაშკაშა ვარსკვლავი მოძრაობს, მრავალი პრობლემა წარმოიშვება.

„ჩვენ ძალიან ბევრს ვიბრძვით ბნელი ცის მოსაძებნად, მთელი მსოფლიოს მასშტაბით. იმის დანახვა, რომ ამის პოტენციური დამანგრეველი რაღაც სასაცილო საზოგადოების მიერ დაფინანსებული ნონსენსია, გულს მტკენს“, ამბობს ნიკ ჰოუვსი, ასტრონომი და კილდერის ობსერვატორიის (ნორთამბერლენდი) IFLScience-თან ინტერვიუში.

პროექტის ლიდერმა ალექს შაენკომ IFLScience-თან ინტერვიუში განაცხადა, რომ „პრობლემა არ იქნება“ და დაამატა, რომ „მრავალი კოსმოსური აპარატი დაფრინავს ღამის ცაზე, „მაიაკზე“ ბევრად უფრო კაშკაშებიც კი“. ეს გარკვეულწილად მართალია, თუმცა, მრავალ მათგანზე თვალყურის დევნება შეიძლება და მათი ტრაექტორიების კორექტირებაც.

ამ პროექტის შემქმნელი ინჟინრები იმედოვნებენ, რომ ის წაახალისებს ხალხს, რათა უფრო ჩართულნი გახდნენ კოსმოსის ამბებზე. ის მრავალ განსხვავებულ ადგილებზე იფრენს, ამიტომ მისი დანახვა მრავალ ადამიანს შეეძლება.

ეს შეიძლება კარგი იყოს. მაგრამ რამდენიმე ასტრონომს შეიძლება საქმე გაუფუჭდეს.