გიორგი ჩხაიძემ და თემურ მახარაძემ ბათუმში თანამედროვე ტექნიკით აღჭურვილი ვეტერინარული კლინიკა ჩემი მეგობარი გახსნეს, სადაც მაღალი ხარისხის მომსახურეობას უწევენ ოთხფეხა მეგობრებს. ბიზნესი 3 წლის წინ, პანდემიის პერიოდში, სპონტანურად, საკუთარი საჭიროებებიდან გამომდინარე წამოიწყეს და ახლა უკვე ჩემი მეგობარი ბათუმში 4 ობიექტითაა წარმოდგენილი.

კლინიკის თანადამფუძნებლი, გიორგი ჩხაიძე იხსენებს, რომ ვეტერნინარული კლინიკის გახსნაზე ფიქრი მას შემდეგ დაიწყეს, რაც მას და მის მეგობარს ლაბრადორის ლეკვები აჩუქეს.

"ჩვენი დაინტერესება ვეტერინარიით ერთ კონკრეტულ შემთხვევას უკავშირდება. ვმუშაობდით ბათუმის თოჯინებისა და მოზარდმაყურებელთა თეატრში, მე გახლდით თეატრის სამხატვრო ხელმძღვანელი და თემო დირექტორი. ერთხელ, უცხოეთიდან დაბრუნებულებს თანამშრომლებმა საჩუქრად ორი ლაბრადორის ლეკვი დაგვახვედრეს. დავიწყეთ ფიქრი, რა უნდა გვექნა ორივესთვის, გაჩნდა გარკვეული საჭიროებები, რომელთა შესაბამისი მომსახურება ჩვენს ქალაქში არ იყო", — იხსენებს გიორგი.

ამიტომ, კოლეგებმა გადაწყვიტეს, რომ თვითონ შეექმნათ ადგილი, სადაც ხალისით მოემსახურებოდნენ შინაურ ცხოველებსა და მათ პატრონებს.

"ვფიქრობდით ცხოველების სასტუმროზეც, თუმცა საბოლოოდ ვეტერინარული კლინიკის გაკეთება გადაწყდა. არანაირი გამოცდილება არ გვქონდა ამ სფეროში, მე განათლებით რეჟისორი ვარ, ჩემი მეგობარი კი ფინანსისტია. თუმცა ამას არ დავუბრკოლებივართ, ჩვენი ჩანაფიქრის განხორციელებაში", — ამბობს გიორგი.

ვეტერინარული კლინიკა მინიმალური საწყისი კაპიტალით გახსნეს და მომხმარებლებს მომსახურებას ერთ პატარა კაბინეტში უწევდნენ, თიბისის მხარდაჭერამ კი განვითარების შესაძლებლობა მისცათ.

"წელს, თიბისის მხარდაჭერით, გავხსენით კლინიკა და სამი მაღაზია, სადაც შეიძლება შინაური ცხოველისთვის საჭირო საკვები, წამლები თუ სხვადასხვა აქსესუარები შეიძინოთ. რაც ყველაზე მნიშვნელოვანია, შევძელით ისეთი სამედიცინო ტექნიკის შემოტანა, როგორიც აქამდე ბათუმში არ ყოფილა ხელმისაწვდომი, რენტგენის აპარატით დაწყებული დამთავრებული ექოსკოპიის, ანესთეზიის და ხელოვნური სუნთქვის აპარატებით", — აღნიშნავს გიორგი.

ასე იქცა ეს პატარა ვეტერინალური მომსახურების კაბინეტი მაღალტექნოლოგიურ ცენტრად, სადაც დასაქმებულია 20-მდე ადამიანი, რომლებიც სიყვარულით ემსახურებიან ჩვენს ოთხფეხა მეგობრებს.

გიორგიმ ახალ წამოწყებასთან ერთად პროფესიაც კი შეიცვალა, ანესთეზიოლოგია შეისწავლა და ამ მიმართულებითაც მუშაობს. ამასთან, კლინიკაში გამოცდილი ვეტერინარი და ქირურგი, ირაკლი თეჯოიანია დასაქმებული. გიორგის თქმით, სწორედ მასთან ერთად გეგმავენ, რომ საქართველოში პირველად, კატარაქტის ოპერაცია დანერგონ.

"ჩვენ ვგრძნობთ ჩვენს წილ პასუხისმგებლობას მიუსაფარი ცხოველებისადმი, შეფარებული გვყავს რამდენიმე მათგანი და კასტრაცია-სტერილიზაციის ოპერაციებს უსასყიდლოდ ვუტარებთ. მთელ სულს და გულს ვდებთ ამ საქმეში და სამომავლოდ გვინდა ისეთი სერვისები შემოვიტანოთ საქართველოში, რაც აქამდე ხელმისაწვდომი არ იყო ვეტერინარიაში", — ამბობს გიორგი.