"ყოველთვის "არ გაჩერდეს" პრინციპით ვმოქმედებ" — ეს პაატა მერებაშვილის სიტყვებია, საქართველოს ბანკის გუნდის წევრისა და ჩემპიონი ძიუდოისტის.

სულ ცოტა ხნის წინ, სლოვენიის ქალაქ პოდჩეტრტეკში ვეტერან ძიუდოისტა შორის ევროპის ჩემპიონატი ჩატარდა, რომელშიც პაატამ ევროპის ჩემპიონის ტიტული მოიპოვა. ევროპის ჩემპიონობის გარდა, მის რეგალიებს შორისაა საქართველოს ჩემპიონობა. ის უკვე 18 წელია სპორტის ამ სახეობაში ასპარეზობს და უამრავი ეროვნული თუ საერთაშორისო ჯილდოს მფლობელია.

წაიკითხეთ ინტერვიუ ჩემპიონ ძიუდოისტთან და საქართველოს ბანკის გუნდის წევრ, პაატა მერებაშვილთან.

პაატა, პირველ რიგში, გილოცავთ ევროპის ჩემპიონობას და კიდევ მრავალ გამარჯვებას გისურვებთ. უკვე 18 წელია ძიუდოში ასპარეზობთ, როდის და რატომ დაინტერესდით სპორტის ამ სახეობით?

ჩემთვის დიდი პატივია, როდესაც საქართველოს საერთაშორისო ჩემპიონატებზე წარვადგენ და ჩვენი დროშის ქვეშ ვასპარეზობ. ეს დამატებით მუხტს მმატებს და ყოველთვის არგაჩერებისკენ მიბიძგებს.

როგორც იცით, ჩვენთან, ქართლში, ჭიდაობა ძალიან პოპულარული სპორტია, აქ თითქმის მთელი წლის განმავლობაში ტარდება ქართული ჭიდაობები. სწორედ სპორტის ამ სახეობის და ბაბუის დამსახურებაა, რომ 7 წლის ასაკიდან დავიწყე ძიუდოში ვარჯიში.

გარდა იმისა რომ წარმატებული ძიუდოისტი ხართ, ასევე მუშაობთ საქართველოს ბანკშიც შიდა ქართლისა და სამცხე-ჯავახეთის რეგიონალურ წარმომადგენლობაში. თქვენთვის რას ნიშნავს, იყო საქართველოს ბანკის დიდი გუნდის წევრი?

ეს არის ჩემი პირველი სამსახური აქტიური სპორტის დასრულების შემდეგ. საქართველოს ბანკი არის კომპანია, რომელსაც საერთო სულისკვეთება და უკეთესი მომავლის შექმნისკენ სწრაფვა ამოძრავებს.

საქართველოს ბანკის დიდ გუნდში ყოველთვის გრძნობ მხარდაჭერას არა მხოლოდ საკუთარი, არამედ სხვა დეპარტამენტებისგანაც. ეს ყველაფერი კი მაძლევს სამსახურით სიამაყის განცდას და მიჩენს გუნდთან მიკუთვნებულობის შეგრძნებას.

როგორია თქვენი ერთი სამუშაო დღე, როგორ ანაწილებთ დროს სპორტსა და ბანკს შორის?

სამუშაო დღე დილით ადრე გუნდის წევრებთან ერთად პოზიტიურად და კეთილგანწყობით იწყება. დღის მანძილზე მივდივარ სხვადასხვა ქალაქებში და ვემსახურებით ჩვენს სერვისცენტრებს. დიდი ხელშეწყობა მაქვს გუნდის წევრებისგანაც. ვარჯიშს სამუშაო საათების შემდეგაც თავისუფლად ვასწრებ. ერთმანეთს ხელს არ უშლის სამსახური და სპორტი.

აღსანიშნავი და ჩემთვის სასიხარულოა ის ფაქტიც, რომ ჩემი პირველი მწვრთნელი — გიორგი გამდლიშვილი ამჟამად არის ჩემი კოლეგა და გვიწევს ერთად მუშაობა საქართველოს ბანკის გუნდში.

რომელია თქვენი ის თვისება, რომელიც ერთნაირად გეხმარებათ როგორც ძიუდოში, ასევე საქართველოს ბანკში მუშაობაში?

ჩემთვის ასეთი თვისება სამია — მონდომებულობა, მიზანდასახულობა და მოტივირებულობა. ჩემი აზრით, ამ სამი თვისების გარეშე წარმატება ვერ მიიღწევა.

როგორია თქვენი სამომავლო გეგმები სპორტული კარიერის მიმართულებით?

ყოველთვის ვმოქმედებ პრინციპით "არ გაჩერდე". მსურს, მოცემულ რანგში მსოფლიო ჩემპიონატიც ოქროს მედლით დავასრულო.