წყალქვეშა ნავი, რომელსაც ტურისტები ჩაძირული ტიტანიკის ნარჩენებთან მიჰყავდა, ატლანტის ოკეანეში 18 ივნისს გაუჩინარდა. ბორტზე ხუთი ადამიანი იმყოფება, რომელთაგან ერთ-ერთი წყალქვეშა ნავის მესაჭეა. როგორც აღმოჩნდა, მესაჭის ცოლი ვენდი რაში ტიტანიკის მგზავრების შთამომავალია. კერძოდ, ვენდი ტიტანიკის ორი მგზავრის, ისიდორ და იდა შტრაუსების, შვილთაშვილის შვილიშვილია.

ისიდორი და იდა ტიტანიკის მგზავრებს შორის ორი უმდიდრესი ადამიანი იყო. ცოლ-ქმარი საცალო ვაჭრობაზე დაფუძნებულ ბიზნესს მართავდა. მათი შთამომავალი ვენდი კი, წყალქვეშა ნავის მესაჭე სტოკტონ რაშზე 1986 წელს დაქორწინდა. სტოკტონმა OceanGate-ის რამდენიმე ექსპედიციაში მიიღო მონაწილეობა და ტიტანიკის ნანგრევებში წყალქვეშა ნავით ხალხი წაიყვანა. ახლა კი დანარჩენ 4 მგზავრთან ერთად სტოტკონიც დაკარგულად ითვლება.

ვენდის წინაპრებმა, რომლებიც ტიტანიკზე დაიღუპნენ, სამყაროს თავი მათი ტრაგიკული სასიყვარულო ისტორიით დაამახსოვრებს. ტიტანიკის ჩაძირვას გადარჩენილმა მგზავრებმა გაიხსენეს, რომ ისიდორმა სამაშველო ნავში ჩაჯდომაზე უარი თქვა და ადგილი სხვა ბავშვებსა და ქალებს დაუთმო. იდამ კი განაცხადა, რომ ქმარს მარტო არ დატოვებდა და გემბანზე დარჩა.

ფოტო: 20th Century Fox

ისიდორისა და იდას ისტორია ჯეიმს კამერონმაც უკვდავყო. 1997 წელს გადაღებულ ტიტანიკში ხანდაზმულ წყვილს ვხედავთ, რომლებიც საწოლში ჩახუტებულები ლაინერის ჩაძირვას ელოდებიან. ამ პერსონაჟების ინსპირაციის წყარო კი ისიდორი და იდა იყვნენ. ტიტანიკის ჩაძირვიდან 2 კვირის შემდეგ ისიდორის გვამი იპოვეს, იდა კი ისევ დაკარგულად ითვლება.

შეგახსენებთ, რომ გაუჩინარებულ წყალქვეშა ნავს რამდენიმე გემი ეძებს, რომლებსაც სპეციალური აღჭურვილობა და ექსპერტები გუნდით თან ახლავს. ზოგიერთ მათგანს იმ ადგილამდე ჯერ არ მიუღწევია, საიდანაც ნავი გაუჩინარდა, რადგან ასეთი გემების გადაადგილებას ძალიან დიდი დრო სჭირდება. პარალელურად კი გაუჩინარებულ წყალქვეშა ნავზე დარჩენილი ჟანგბადის მარაგი იწურება.

ასევე იხილეთ: