რა მოხდა: 12 ივნისს, ბათუმში, საავადმყოფოში გარდაიცვალა არასრულწლოვანი გოგო, რომელიც საცხოვრებელი კორპუსიდან გადმოვარდა.

  • პროკურატურის ინფორმაციით, დაღუპული მოზარდი სექსუალური ძალადობის მსხვერპლი იყო.
  • "გამოძიებით დადგინდა, რომ ბრალდებული დაზარალებულთან სისტემატურად ამყარებდა სქესობრივ კავშირს, სისტემატურად ამცირებდა, აყენებდა სიტყვიერ შეურაცხყოფას და ლახავდა მის პატივსა და ღირსებას", — ნათქვამია უწყების განცხადებაში.

დეტალები: სამართალდამცველებმა ბრალდებული 13 ივნისს დააკავეს.

  • მას ბრალდება სსკ-ის 115-ე მუხლის მეორე ნაწილის ა ქვეპუნქტითა (თვითმკვლელობამდე მიყვანა გენდერის ნიშნით) და 140-ე მუხლის პირველი ნაწილით (სრულწლოვნის მიერ სქესობრივი კავშირის დამყარება წინასწარი შეცნობით 16 წლის ასაკს მიუღწეველთან) წარედგინა.
  • პირველი ბრალდება ითვალისწინებს პატიმრობას სამიდან ექვს წლამდე, მეორე კი — შვიდიდან ცხრა წლამდე თავისუფლების აღკვეთას.

მნიშვნელოვანია ვიცოდეთ, რომ ძალადობა არ გულისხმობს მხოლოდ ფიზიკურ შეხებას. ფსიქოლოგიური ზეწოლა, მუქარა, შანტაჟი, სიტყვიერი შეურაცხყოფა, ასევე, ძალადობაა და კანონით აკრძალულია.

  • ძალადობის შემთხვევაში პოლიციის გამოძახება შესაძლებელია 112-ზე დარეკვით. ზარი უფასოა.
  • საკონსულტაციო მომსახურების გაწევის მიზნით ფუნქციონირებს ცხელი ხაზი — 116 006.

საჭიროების შემთხვევაში შეგიძლიათ დარეკოთ შემდეგ ნომრებზე:

  • საფარის უფასო იურიდიული დახმარება — 0322 30 76 03; 599 40 76 03;
  • სახალხო დამცველის ცხელი ხაზი — 1481.