8 არასამთავრობო ორგანიზაცია სახელმწიფო უწყებებს, მედიასა და სახალხო დამცველს ერთობლივი წერილით მიმართავს.

რატომ არის მნიშვნელოვანი: მე-7 დღეა, ჭიათურაში 3000-ზე მეტი მაღაროელი და მათი ოჯახის წევრები მძიმე სამუშაო პირობების გაუმჯობესების მოთხოვნით საპროტესტო აქციებს მართავენ.

  • საუბარია ისეთი ბაზისური შრომითი უფლებების დაცვაზე, როგორებიცაა: ხელფასის ზრდა ინფლაციის გათვალისწინებით, შრომის უსაფრთხოება, აღჭურვილობისა და სპეცტანსაცმლის შეცვლა, სანგრების განიავება, საშხაპეების მოწყობა, ახალი, მეტად დატვირთული და ნაკლებად ანაზღაურებული სამუშაო გრაფიკიდან, ძველ განრიგზე დაბრუნება.
  • მაღაროელთა განცხადებით, ისინი გეგმავენ, მიმართონ პროტესტის უკიდურეს ფორმას, შიმშილობას.

დეტალები: არასამთავრობო ორგანიზაციის განცხადებით, ჯორჯიან მანგანეზის მხრიდან შრომითი დარღვევები განსაკუთრებით საყურადღებოა, რადგან 2017 წლიდან კომპანიას სახელმწიფოს სპეციალური მმართველი განაგებს.

  • "მიუხედავად სახელმწიფო მმართველის უშუალო ჩართულობისა, ცხადია, რომ 2023 წლის 1 მაისიდან, ჭიათურაში სამუშაო პროცესი, კიდევ უფრო დამძიმებული შრომის პირობებით აღდგა", — ვკითხულობთ განცხადებაში.

შრომის, ჯანმრთელობისა და სოციალური დაცვის მინისტრს NGO-ები მოუწოდებენ, დაუყოვნებლივ ჩაერთონ პროცესში, ადგილზე შეისწავლონ სიტუაცია და დანიშნონ სამინისტროს მედიატორი.

  • "ადგილზე შეისწავლონ დასაქმებულთა შრომის პირობები, მათ შორის, უსაფრთხოების დაცვისა და აღჭურვილობის საშუალებების მდგომარეობა, კვებისა და სანიტარული კვანძების მდგომარეობა და გასცენ კომპანიაზე სავალდებულო მითითებები".

სახალხო დამცველს არასამთავრობო ორგანიზაციები მოუწოდებენ, პირნათლად შეასრულოს მასზე დაკისრებული მოვალეობა, ჩავიდეს ჭიათურაში და ადგილზე გაეცნოს მაღაროელების პრობლემებს.

  • "გამოსცეს წერილობითი და ზეპირი რეკომენდაციები შესაბამისი პასუხისმგებელი უწყებების მიმართ, გააკეთოს განცხადებები მაღაროელთა შრომითი უფლებების დასაცავად".

მედიას კი მიმართავენ, აქტიურად გააშუქოს ჭიათურაში მიმდინარე მასშტაბური საპროტესტო აქცია.

  • "ხელი შეიწყოს საკითხის პოლიტიკურ დღის წესრიგში დაყენებას და გადაწყვეტილების მიმღები პირების პასუხისმგებლობის გამოკვეთას".