ერთი ნივთის შეძენითაც კი შეგვიძლია, გარემოსა და ადამიანებზე ვიზრუნოთ. თუ შოპინგისას, სადღესასწაულო ბაზრობებზე ხეტიალისას, ონლაინ მაღაზიის თვალიერებისას რაიმე აქსესუარი, ტანსაცმელი ან სხვა ნივთი თვალს მოგვჭრის და იმაზეც დავფიქრდებით, ვინ არიან ადამიანები, რომლებმაც მის დამზადებაზე წარმოსახვა, დრო და ენერგია არ დაზოგეს, შესაძლოა, სოციალურად პასუხისმგებლიან გადაწყვეტილებამდე მივიდეთ.

ონლაინ თუ ფიზიკურ სივრცეში ახალ-ახალი აღმოჩენების გაკეთება ვის არ გვიყვარს, თუ ამავე დროს სხვადასხვა სოციალური ჯგუფის გაძლიერებაში მცირე წვლილი მაინც შეგვაქვს, ეს პროცესი კიდევ უფრო ღირებულია.

2022 წლის სექტემბერში, ევროკავშირის ფინანსური მხარდაჭერით, პროექტ სოციალური მეწარმეობის განვითარება მდგრადი და ინკლუზიური საზოგადოებისთვის ფარგლებში, სოციალური კონცეფციის მაღაზია — ესკი გაიხსნა. ეს არის ადგილი ყველა იმ ადამიანისთვის, რომელიც უნიკალურ, გამორჩეულ ნივთებს ეძებს და სოციალური პასუხისმგებლობაც გააზრებული აქვს.

ესკიმ თავი მოუყარა საქართველოში მოქმედი სხვადასხვა სოციალური საწარმოს პროდუქციას და გადაწყვიტა, რომ ამ გზით მათი პროდუქციის პოპულარიზებასა და გაძლიერებაზე ეზრუნა.

"ესკი გახსნის დღიდან არაერთ მომხმარებელს მასპინძლობს, ავრცელებს ინფორმაციას კონცეფციის შესახებ და ეკონომიკურად აძლიერებს ადგილობრივ სოციალურ მეწარმეებს. ამ ეტაპზე, ესკიში წარმოდგენილია 25 სოციალური საწარმოს 350-ზე მეტი დასახელების ხელნაკეთი ნივთი და ეს რიცხვი მზარდია", — გვიყვებიან ესკიში.

ესკი ჩვეულებრივი ნივთების მაღაზია არ არის, ეს არის სივრცე, რომელიც პირველ რიგში ცდილობს სოციალურად პასუხისმგებლიანი შესყიდვების წახალისებას და ამ მიმართულებით საზოგადოებაში ცნობიერების ამაღლებაზეც ზრუნავს.

ესკიში ქართული სოციალური საწარმოების მიერ დამზადებული სამკაული, ეკოლოგიურად სუფთა სათამაშოები, ჭურჭელი, საკანცელარიო ნივთები, აქსესუარები და სხვა მრავალი ნივთი დაგხვდებათ, რომელიც თქვენს ყურადღებას აუცილებლად მიიქცევს.

ესკის "შოურუმში" წარმოდგენილი პროდუქციის ნახვა მათ Facebook და Instagram გვერდზე, ასევე მაღაზიაში, ნატო ვაჩნაძის 7 ნომერში შეგიძლიათ. შეიძინე ესკიში და მხარი დაუჭირე ქართულს.

სტატია შექმნილია On.ge-ის კამპანიის — შექმნილია დამოუკიდებელ საქართველოში — ფარგლებში. On.ge დამოუკიდებელ საქართველოში შეიქმნა და გვჯერა, რომ მცირე ბიზნესების მხარდაჭერა ჩვენი მისია და პასუხისმგებლობაა, ამიტომაც 26 მაისთან 26 ივნისამდე ჩვენი ციფრული და კრეატიული შესაძლებლობებით, მხარს დავუჭერთ დამოუკიდებელ საქართველოში შექმნილ მცირე ბიზნესებსა და სტარტაპებს. გაიგე მეტი: შექმნილია დამოუკიდებელ საქართველოში — On.ge-ის შეთავაზება მცირე ბიზნესებსა და სტარტაპებს