რატომ არის მნიშვნელოვანი: დილით ოკუპანტებმა უკრაინაში ერთ-ერთი ყველაზე დიდი, კახოვკის ჰიდროელექტროსადგური ააფეთქეს.

  • უკრაინული მედიის გავრცელებულ კადრებში ჩანს, რომ დაწყებულია წყლის ნაკადის დასახლებული ტერიტორიისკენ გადინება, რაც დატბორვის საფრთხეს ზრდის.
  • მაგალითად, არსებობს მიმდებარე რაიონების, განსაკუთრებით მდინარე დნეპრის მარჯვენა სანაპიროს დატბორვის საფრთხე.
  • რუსული პროპაგანდისტული მედია ავრცელებს ინფორმაციას, რომ თითქოს ჰიდროელექტროსადგური უკრაინამ დაბომბა და ახლა მზადაა ტერიტორიიდან მშვიდობიანი მოქალაქეები გაიყვანოს.

დეტალები: უკრაინული მედიის ცნობით, კახოვკას ჰიდროელექტროსადგურის კაშხლის ნგრევამ ასევე დაარტყა ოკუპანტების დანაყოფებს, რომლებიც წყალდიდობის ზონებში იყვნენ განლაგებულნი.

  • უკრაინელმა ბლოგერმა გაავრცელა აუდიოჩანაწერი, სადაც ისმის, როგორ ყვირიან ოკუპანტები და წყლის ადიდების გამო თავს ხეს აფარებენ — ამბობენ, რომ თავს ვეღარ იკავებენ.
  • როგორც ბლოგერი აღნიშნავს, ეს კიდევ ერთი დასტურია იმისა, რომ ჰიდროელექტროსადგურის კაშხლის აფეთქების მასშტაბები დაუგეგმავი იყო.

გამოხმაურებები: კახოვკას აფეთქებას ვოლოდიმირ ზელენსკი გამოეხმაურა და თქვა, რომ რუსი ტერორისტები კახოვკის ჰიდროელექტროსადგურის განადურებით მხოლოდ უდასტურებენ მთელ მსოფლიოს, რომ ისინი უკრაინის მიწის ყველა ნაწილიდან უნდა განიდევნონ.

  • ამბობს, რომ მათ ერთი მეტრი მიწაც არ უნდა დარჩეთ, რადგან ისინი ყველა მეტრს ტერორისთვის იყენებენ და მხოლოდ უკრაინის გამარჯვება დააბრუნებს უსაფრთხოებას.
  • "ტერორისტები ვერ შეძლებენ, შეაჩერონ უკრაინა წყლით, რაკეტებითა თუ ნებისმიერი სხვა გზით. კახოვკაში ყველა სამსახური მუშაობს. მე მოვიწვიე ეროვნული უშიშროების საბჭო", — ამბობს პრეზიდენტი.
  • უკრაინის საგარეო საქმეთა მინისტრი, დმიტრო კულება ამბობს, რომ ამით რუსეთმა ბოლო ათწლეულების განმავლობაში ევროპის უდიდესი ტექნოლოგიური კატასტროფა გამოიწვია და ათასობით მოქალაქის სიცოცხლე საფრთხეში ჩააგდო.
  • "ეს არის ომის საზარელი დანაშაული. 21-ე საუკუნის უდიდესი ტერორისტის, რუსეთის შეჩერების ერთადერთი გზა მისი უკრაინიდან გაგდებაა", — წერს კულება.
  • პრეზიდენტის ადმინისტრაციის ხელმძღვანელმა ანდრეი ერმაკმა განაცხადა, რომ რუსების მიერ კახოვკას ჰიდროელექტროსადგურის აფეთქება მორიგი სამხედრო დანაშაული და ეკოციდია.
  • როგორც იერმაკმა Telegram-ზე აღნიშნა, ამის გამო პრეზიდენტი ვოლოდიმირ ზელენსკი სასწრაფოდ იწვევს ეროვნული უსაფრთხოებისა და თავდაცვის საბჭოს.
  • "დღეს ადამიანების უსაფრთხოება პრიორიტეტია. ჩვენ მტრი უნდა დაისაჯოს საერთაშორისო დონეზე", — წერს ერმაკი.